ന്യൂഡൽഹി : ഫെയ്സ്ബുക്കിന്റെ മാതൃകമ്പനിയായ മെറ്റയുടെ ഇന്ത്യാ മേധാവി മലയാളിയായ അജിത് മോഹൻ രാജിവച്ചു. നാലുവർഷം മുൻപാണ് അദ്ദേഹം പദവി ഏറ്റെടുത്തത്. ദശലക്ഷക്കണക്കിന് ഇന്ത്യൻ ബിസിനസുകൾക്കും പങ്കാളികൾക്കും സേവനമനുഷ്ഠിക്കാൻ കഴിയുന്ന തരത്തിൽ മെറ്റയുടെ ഇന്ത്യയിലെ പ്രവർത്തനങ്ങൾ രൂപപ്പെടുത്തുന്നതിലും വളർത്തുന്നതിലും അജിത് പ്രധാന പങ്കു വഹിച്ചിട്ടുണ്ടെന്ന് മെറ്റയുടെ വൈസ് പ്രസിഡന്റ് നിക്കോള മാൻഡൽസൻ പറഞ്ഞു.
കൊച്ചിയിലെ ഉദ്യോഗമണ്ഡൽ സ്കൂളിലെ വിദ്യാഭ്യാസത്തിനു ശേഷം അജിത്തിന്റെ പഠനമെല്ലാം വിദേശത്തായിരുന്നു. ആദ്യം സിംഗപ്പൂരിലെ നംയാങ്ടെക്നോളജിക്കൽ യൂണിവേഴ്സിറ്റിയിൽനിന്നു ബിരുദപഠനം. പിന്നീട് ജോൺ ഹോപ്കിൻസ് സർവകലാശാലയിൽനിന്ന് ഇക്കണോമിക്സിലും ഇന്റർനാഷനൽ റിലേഷൻസിലും ബിരുദാനന്തരബിരുദം. തുടർന്ന് പെൻസിൽവാനിയ സർവകലാശാലയിലെ വാർട്ടൺ സ്കൂളിൽനിന്ന് ഫിനാൻസിൽ എംബിഎ ബിരുദമെടുത്തു.
ആർതർ ഡി.ലിറ്റിൽ, മക്കൻസി എന്നിവിടങ്ങളിൽ കൺസൽട്ടൻസി സ്ഥാനങ്ങൾ വഹിച്ച ശേഷം 2012ലാണ് അജിത് സ്റ്റാർ ടിവി നെറ്റ് വർക്കിലെത്തുന്നത്. സ്റ്റാർ ടിവിയിൽ സീനിയർ വൈസ് പ്രസിഡന്റ്, എക്സിക്യൂട്ടീവ് വൈസ് പ്രസിഡന്റ് സ്ഥാനങ്ങൾ കൈകാര്യം ചെയ്തു. ശേഷം 2015 നവംബറിൽ സ്മാർ ഇന്ത്യയുടെതന്നെ ഹോട്ട്സ്റ്റാർ ഡിജിറ്റൽ ആൻഡ് മൊബൈൽ എന്റർടൈൻമെന്റ് പ്ലാറ്റ്ഫോമായ ഹോട്ട്സ്റ്റാറിന്റെ പ്രസിഡന്റായി. 2016 ഏപ്രിലിൽ ഹോട്ട്സ്റ്റാറിന്റെ സിഇഒ സ്ഥാനം വഹിച്ചു. 2017 ഒക്ടോബറിൽ ഉമങ് ബേദി സ്ഥാനമൊഴിഞ്ഞതു പിന്നാലെയാണ് ഫെയ്സ്ബുക് ഇന്ത്യയുടെ തലപ്പത്തേക്ക് അജിത് എത്തിയത്.
