ജാര്ഖണ്ഡ് : അനധികൃത ഖനന കേസില് ചോദ്യം ചെയ്യുന്നതിനായി ഹാജരാകാന് ആവശ്യപ്പെട്ട് ജാര്ഖണ്ഡ് മുഖ്യമന്ത്രി ഹേമന്ത് സോറന് എന്ഫോഴ്സ്മെന്റ് ഡയറക്ടറേറ്റ് പുതിയ സമന്സ് അയയ്ക്കും. അനധികൃത ഖനന അഴിമതിക്കേസില് ഇഡിക്ക് മുമ്പില് ചോദ്യം ചെയ്യലിന് ഹാജരാകില്ലെന്ന് സോറന് വ്യക്തമാക്കിയിരുന്നു. തന്നെ വന്ന് അറസ്റ്റ് ചെയ്യൂവെന്നും അദ്ദേഹം ഇഡിയെ വെല്ലുവിളിച്ചു. മുന് നിശ്ചയിച്ച പ്രകാരം പാര്ട്ടി പ്രവര്ത്തകരെ അഭിസംബോധന ചെയ്യുകയായിരുന്നു അദ്ദേഹം. വ്യാഴാഴ്ച ഇഡിയുടെ റാഞ്ചിയിലെ ഓഫീസിലേക്ക് ഹേമന്ത് സോറനെ ചോദ്യം ചെയ്യാന് വിളിപ്പിച്ചിരുന്നു. പിന്നാലെയാണ് ഇഡിയുടെ പുതിയ നീക്കം.
കഴിഞ്ഞ സമന്സില് ഹാജരാകാന് തനിക്ക് ഒരു ദിവസത്തെ സമയം മാത്രമേ നല്കിയിട്ടുള്ളൂവെന്നും അതിനാല് ഹിയറിംഗിന് ഹാജരാകാന് കഴിയില്ലെന്നും സോറന് ഇഡിയെ കത്തിലൂടെ അറിയിച്ചിരുന്നു. ജാര്ഖണ്ഡ് മുഖ്യമന്ത്രി എന്ന നിലയില് തനിക്ക് നിരവധി പ്രതിബദ്ധതകളുണ്ടെന്നും അദ്ദേഹം പറഞ്ഞു. ഹിയറിംഗിന് ഹാജരാകാന് തനിക്ക് മൂന്നാഴ്ചത്തെ സമയം നല്കണമെന്ന് സോറന് ഇഡിയോട് ആവശ്യപ്പെട്ടിട്ടുണ്ട്. ഈ സാഹചര്യത്തിലാണ് പുതിയ സമന്സ് അയക്കാന് ഇഡി തീരുമാനിച്ചത്.
