പത്തനംതിട്ട: ജില്ലയില് കോവിഡ് പോസിറ്റീവാകുന്ന ഇതര സംസ്ഥാന തൊഴിലാളികള്ക്കായി ഇലന്തൂര്, പന്തളം, മല്ലപ്പള്ളി, കോന്നി, റാന്നി, കോയിപ്രം, അടൂര് എന്നിവിടങ്ങളില് ഡൊമിസിലറി കെയര് സെന്ററുകള് പ്രവര്ത്തനം ആരംഭിക്കും. ഇതിന് മുന്നോടിയായി ജില്ലാ കളക്ടര് ഡോ. നരസിംഹുഗാരി തേജ് ലോഹിത് റെഡ്ഡിയുടെ നേതൃത്വത്തില് ഓണ്ലൈന് യോഗം ചേര്ന്ന് സ്ഥിതിഗതികള് വിലയിരുത്തി.
ജില്ലാ ഭരണകേന്ദ്രം, ബ്ലോക്ക് പഞ്ചായത്ത്, ഹെല്ത്ത് വിഭാഗം, ജില്ലാ ലേബര് വിഭാഗം എന്നിവരുടെ മേല്നോട്ടത്തിലാണ് ഇതര സംസ്ഥാന തൊഴിലാളികള്ക്കുള്ള ഡൊമിസിലറി കെയര് സെന്ററുകള് പ്രവര്ത്തിക്കുക. ഈ സെന്ററുകളില് അസിസ്റ്റന്റ് ലേബര് ഓഫീസര്മാരെ നോഡല് ഓഫീസര്മാരായി നിയമിച്ചു. അതത് ബ്ലോക്ക് പഞ്ചായത്തിന്റെ നേതൃത്വത്തില് പ്രവര്ത്തിക്കുന്ന സെന്ററുകളിലേക്കു ഭക്ഷണം ഉള്പ്പെടെ ജനകീയ ഭക്ഷണശാലകളാണു നല്കുക.
ഇലന്തൂര്, മല്ലപ്പള്ളി ബ്ലോക്ക് പഞ്ചായത്തിന്റെ കീഴിലായി ഇതര സംസ്ഥാന തൊഴിലാളികള്ക്കുള്ള ഡൊമിസിലറി കെയര് സെന്ററുകള് നാളെ (ജൂണ് 10 വ്യാഴം) പ്രവര്ത്തനം ആരംഭിക്കും. ഇലന്തൂരില് 40 പേര്ക്കുള്ള കിടക്കകളാണ് ഒരുക്കിയിട്ടുള്ളത്. മല്ലപ്പള്ളി ബ്ലോക്ക് പഞ്ചായത്തിന്റെ നേതൃത്വത്തിലുള്ള ഡൊമിസിലറി കെയര് സെന്ററില് 23 കിടക്കകളാണ് ഒരുക്കിയിട്ടുള്ളത്. പുളിക്കീഴ്, റാന്നി എന്നിവിടങ്ങളില് ജൂണ് 11 വെള്ളിയാഴ്ച ഡൊമിസിലറി കെയര് സെന്ററുകള് പ്രവര്ത്തനം ആരംഭിക്കും.
ഇലന്തൂര് സെന്റ് തോമസ് കോളജ് വനിതാ ഹോസ്റ്റല്, പന്തളം കുളനട പഞ്ചായത്ത് ഹയര് സെക്കന്ഡറി സ്കൂള്, മല്ലപ്പള്ളി കീഴ്വായ്പൂര് ഗവ.വൊക്കേഷണല് ഹയര്സെക്കന്ഡറി സ്കൂള്, കോന്നി ഗവ.ഹയര് സെക്കന്ഡറി സ്കൂള്, റാന്നി വടശേരിക്കര മാര്ത്തോമാ ബി.എഡ് കോളജ്, കോയിപ്പുറം ഇരവിപേരൂര് ലൈഫ് കെയര് ഹോസ്പിറ്റല് എന്നിവിടങ്ങളിലാണ് ഡൊമിസിലറി കെയര് സെന്റര് പ്രവര്ത്തനം ആരംഭിക്കുന്നത്. അടൂര് ഡൊമിസിലറി കെയര് സെന്ററിന്റെ പ്രവര്ത്തനവും സെന്റര് ലഭ്യമാകുന്ന മുറയ്ക്ക് വേഗത്തില് ആരംഭിക്കാനും യോഗത്തില് തീരുമാനമായി.
ഇതര സംസ്ഥാന തൊഴിലാളികളില് 118 പേരാണു നിലവില് കോവിഡ് ബാധിതരായി ജില്ലയില് ചികിത്സയിലുള്ളത്. ജില്ലാ ലേബര് ഓഫീസിന്റെ നേതൃത്വത്തില് തൊഴിലാളികള്ക്കായി 24 മണിക്കൂറും കോള് സെന്റര് പ്രവര്ത്തിക്കുന്നുണ്ട്. ബ്ലോക്ക് പഞ്ചായത്ത് പ്രസിഡന്റുമാര്, എ.ഡി.സി, ജില്ലാ ലേബര് ഓഫീസര് തുടങ്ങിയവര് യോഗത്തില് പങ്കെടുത്തു.
