പത്തനംതിട്ട : ആവർത്തന വിരസത മൂകാഭിനയ വേദിയിൽ നിറഞ്ഞപ്പോൾ ഇതിൽ നിന്നും വ്യത്യസ്തമായി സമൂഹത്തിൽ പിൻതള്ളപ്പെടുന്ന ട്രാൻസ്ജെണ്ടർ വിഭാഗത്തിന്റെ കഥ അരങ്ങിൽ എത്തിച്ചിരിക്കുകയാണ് എറണാകുളം പറവൂർ എസ് എൻ എം കോളേജിലെ വിദ്യാർഥികൾ. മീനാക്ഷി, ആരതി, ജോസ്, ആര്യ, സോനാ, ആയുഷ് എന്നിവർ നിറഞ്ഞുനിന്ന മൂകാഭിനയം സദസിനെയും ഏറെ ആകർഷിച്ചു.
ഗുരു വൈശാഖാന്റെ ശിക്ഷണത്തിൽ വെറും പതിനഞ്ച് ദിവസം കൊണ്ടാണ് ഇവർ ഈ മുകാഭിനയം പഠിച്ചത്. ട്രാൻസ്ജൻഡർ വിഭാഗം സമൂഹത്തിലും സ്വന്തം കുടുംബത്തിലും നേരിടുന്ന വെല്ലുവിളികൾ സമൂഹത്തെ ബോധ്യപ്പെടുത്തുക എന്ന ലക്ഷ്യവും ഈ മൂകാഭിനയത്തിന് ഉണ്ടായിരുന്നു എന്ന് മത്സരാർഥികൾ പറഞ്ഞു. ഇവരുടെ ഈ ഉദ്യമം നിറഞ്ഞ കയ്യടികളോടെ ആണ് ജനം എം ജി യൂണിവേഴ്സിറ്റി കലോത്സവ വേദിയിൽ സ്വീകരിച്ചത്.
