റാന്നി : അജൈവ മാലിന്യങ്ങള് സംഭരിക്കാന് ഇട്ടിയപ്പാറ ബൈപ്പാസിലെ മിനര്വ്വ ജംങ്ഷനില് സ്ഥാപിച്ച മിനി എം.സി.എഫ് (മെറ്റീരിയല് കളക്ഷന് ഫെസിലിറ്റി) നാട്ടുകാര്ക്ക് ബാധ്യതയായി മാറുന്നു. ജൈവ മാലിന്യങ്ങള് ഇടാനായി സ്ഥാപിച്ച എം.സി.എഫിലും പുറത്തും മാലിന്യങ്ങള് കുന്നുകൂടിയിരിക്കുകയാണ്. ഭക്ഷണാവശിഷ്ടങ്ങളടക്കമുള്ള മാലിന്യങ്ങള് ചീഞ്ഞളിഞ്ഞ് ദുര്ഗന്ധം പരത്തുകയാണ്. പഴവങ്ങാടി പഞ്ചായത്തിന്റെ ആയുര്വ്വേദ ആശുപത്രിയുടെ മുന്നിലാണ് ഈ ദുര്സ്ഥിതി.
വാര്ഡുകളിലെ മാലിന്യങ്ങള് എല്ലാം ഒരിടത്ത് ശേഖരിക്കുന്നതിനാണ് എം.സി.എഫ് സ്ഥാപിച്ചത്. ഇവിടെ നിന്നും സംസ്ക്കരണ കേന്ദ്രത്തിലേക്കു പിന്നീട് മാലിന്യങ്ങള് മാറ്റുന്ന പദ്ധതിയാണിത്. എന്നാല് പഞ്ചായത്തിലുടനീളം നോക്കുകുത്തിയായി എം.സി.എഫ് ഇതിനോടകം മാറി. വാര്ഡിലെ വീടുകളില് നിന്നും ശേഖരിച്ചതും നാട്ടുകാര് എറിഞ്ഞിട്ടു പോകുന്നതമായ മാലിന്യങ്ങള് ഇവിടെ നിറഞ്ഞു കിടക്കുകയാണ്. സ്ഥലത്ത് കൊതുകുകള് പെരുകുന്ന സ്ഥിതിയാണ്.
നിശ്ചിത തുക ഈടാക്കി ഹരിതസേന പ്രവര്ത്തകര് ശേഖരിക്കുന്ന അജൈവ മാലിന്യങ്ങള് മിനി എം.സി.എഫുകളിലില് ശേഖരിച്ച് നീക്കുന്ന പദ്ധതി പ്രവര്ത്തനം നിലച്ചതുപോലാണ്. പണം നല്കേണ്ടതിനാല് വീടുകളും സ്ഥാപനങ്ങളും മാലിന്യം നല്കാനും മടിക്കുന്നു. ഇതോടെ ജനങ്ങള് പ്ലാസ്റ്റിക് മാലിന്യങ്ങള് നേരിട്ട് എം.സി.എഫുകളുടെ ഉള്ളിലേക്ക് നിക്ഷേപിച്ചു തുടങ്ങിയതോടെയാണ് ഇവ പൂട്ടിയിട്ടത്. ഇതിനു ശേഷം മാലിന്യങ്ങള് കവറില് കെട്ടി ഇവയുടെ വെളിയില് നിക്ഷേപിക്കുകയാണ് ചെയ്യുന്നത്. ഇതോടെ ആശുപത്രിക്കു മുന്നില് മാലിന്യ ശേഖരണത്തിനായി പഞ്ചായത്ത് സ്ഥാപിച്ച എം.സി.എഫ് രോഗികള്ക്കും നാട്ടുകാര്ക്കും ഒരു പോലെ ബാധ്യത ആയിരിക്കുകയാണ്.
