മാവേലിക്കര : മന്ത്രി വീണാ ജോര്ജിനെ വഴിതെറ്റിച്ച് വേദിമാറ്റി എത്തിച്ച സംഭവത്തില് വകുപ്പ് തല അന്വേഷണം ഉണ്ടാകും. പൂരം ജന്മനക്ഷത്ര മഹോത്സവവുമായി ബന്ധപ്പെട്ട് മാവേലിക്കര കൊറ്റാര്കാവ് ശുഭാനന്ദാശ്രമത്തില് പങ്കെടുക്കേണ്ട മന്ത്രിയെ ചെറുകോല് ശുഭാനന്ദാശ്രമത്തില് എത്തിക്കുകയായിരുന്നു. പന്തളത്ത് നിന്ന് എത്തിയ മന്ത്രിക്ക് മാന്നാര് പോലീസാണ് എസ്കോര്ട്ട് പോയത്. പുതിയകാവ് ജംഗ്ഷനില് എത്തിയപ്പോള് ഇടത്തേക്ക് തിരിഞ്ഞ് കൊറ്റാര്കാവ് ആശ്രമത്തിലേക്ക് കൊണ്ടുപോകേണ്ടതിന് പകരം വലത്തേക്ക് തിരിഞ്ഞ് ചെറുകോല് ആശ്രമത്തിലേക്ക് പോകുകയായിരുന്നു. പൈലറ്റ് ഡ്യൂട്ടിയില് ഉണ്ടായിരുന്ന പോലീസ് ഉദ്യോഗസ്ഥര്ക്ക് പറ്റിയ പിഴവ് കാരണമാണ് വഴിതെറ്റിയത്.
ഗോവ ഗവര്ണര് പി.എസ് ശ്രീധരന് പിള്ളയും കൊടിക്കുന്നില് സുരേഷും വേദിയില് ഇരിക്കുമ്പോഴാണ് ക്ഷണിക്കപ്പെടാതെ മന്ത്രി വീണാ ജോര്ജ് എത്തിയത്. വേദി മാറിയ കാര്യം മനസിലാക്കിയ മന്ത്രി തുടര്ന്ന് മടങ്ങി. മാവേലിക്കര സി.ഐ അടക്കമുള്ളവര്ക്ക് ഗോവ ഗവര്ണറുടെ ഡ്യൂട്ടി ആയിരുന്നതിനാല് മാന്നാര് പോലീസാണ് മന്ത്രിക്ക് എസ്കോര്ട്ട് ഒരുക്കിയത്. പൂരം ജന്മനക്ഷത്ര സമ്മേളനം രണ്ട് ആശ്രമങ്ങളിലും നടന്നിരുന്നതിനാല് മാന്നാര് പോലീസ് അവരുടെ സ്റ്റേഷന് പരിധിയിലുള്ള ആശ്രമത്തിലേക്ക് മന്ത്രിയെ എത്തിക്കുകയായിരുന്നു.
