കൊല്ലം : നിലമേല് സ്വദേശിയായ 12 വയസുകാരനെ നാഗര്കോവില് തിട്ടവിളയിലെ കുളത്തില് മരിച്ച നിലയില് കണ്ടെത്തിയ സംഭവം കൊലപാതകമെന്ന് സംശയിക്കുന്നതായി ബന്ധുക്കള്. നിലമേല് പേഴുവിള വീട്ടില് മുഹമ്മദ് നജീബ്-സുനി ദമ്പതികളുടെ മകന് ആദില് മുഹമ്മദിനെയാണ് മരിച്ച നിലയില് കണ്ടെത്തിയത്. പെരുന്നാള് ആഘോഷിക്കാനാണ് ആദില് മുഹമ്മദ് തിട്ടവിളയിലെ മാതാവിന്റെ കുടുംബവീട്ടില് പോയത്. ഉമ്മയുടെയും സഹോദരങ്ങളുടേയും ഒപ്പമായിരുന്നു യാത്ര.
തൊട്ടടുത്ത വീട്ടിലെ കുട്ടികളോടൊപ്പം കളിക്കാന് പോയ ആദിലിനെ ആറാം തിയതി വൈകീട്ട് കാണാതായി. രണ്ട് ദിവസം പോലീസും ബന്ധുക്കളും നടത്തിയ അന്വേഷണത്തിനൊടുവില് വീടിന് സമീപത്തെ കുളത്തില് ആദിലിനെ മരിച്ചനിലയില് കണ്ടെത്തി. കഴുത്തില് കയര് മുറുക്കിയതിന് സമാനമായ പാട്, നട്ടെല്ലിന്റെ ഭാഗത്ത് ക്ഷതമേറ്റ പാട് എന്നിവ പോസ്റ്റുമോര്ട്ടത്തില് കണ്ടെത്തിയാതായി ബന്ധുക്കള് പറഞ്ഞു. നാഗര്കോവില് പൂതപെട്ടി പോലീസാണ് കേസ് അന്വേഷിക്കുന്നത്. സംഭവവുമായി ബന്ധപ്പെട്ട് പ്രദേശവാസിയായ 14 വയസുകാരനെ ചോദ്യം ചെയ്തു വരികയാണ്. മരണത്തിലെ ദുരൂഹത പുറത്ത് കൊണ്ടുവരാന് കേരള സര്ക്കാര് തമിഴ്നാട് സര്ക്കാരുമായി ബന്ധപ്പെട്ട് വേണ്ട സഹായം ചെയ്യണം എന്ന് ആദില് മുഹമ്മദിന്റെ കുടുംബം ആവശ്യപ്പെടുന്നു.
