കോട്ടയം : പാമ്പാടിയില് കാണാതായ എട്ടാം ക്ലാസ് വിദ്യാര്ഥിനിയെ അയല്വാസിയുടെ വീട്ടിലെ കട്ടിലിന്റെ അടിയില് കണ്ടെത്തിയതായി പോലീസ്. കൂരോപ്പട മാതൃമല താമസിക്കുന്ന വിദ്യാര്ഥിനിയെ ചൊവ്വാഴ്ച ഉച്ചകഴിഞ്ഞ് 3.30 മണിയോടെയാണ് കാണാതായത്. രാത്രി വൈകിയും കാണാത്തതിനെ തുര്ന്ന് വീട്ടുകാര് പാമ്പാടി പോലീസ് സ്റ്റേഷനില് പരാതി നല്കി. തുടര്ന്ന് വീട്ടുകാരും നാട്ടുകാരും പോലീസും വിവിധയിടങ്ങളില് വിശദമായ തിരച്ചില് നടത്തിയെങ്കിലും കണ്ടെത്താനായില്ല.
കുട്ടി ഒളിച്ചിരുന്ന വീട്ടിലുള്ളവര് ബുധനാഴ്ച രാവിലെ കോട്ടയം മെഡികല് കോളജില് പോയി വൈകുന്നേരം 5.30 മണിയോടെ തിരിച്ചെത്തിയത്. ബുധനാഴ്ച രാത്രിയില് മുറിയിലെ കട്ടിലിന്റെ അടിയിലിരുന്ന പാത്രം നീങ്ങിയിരിക്കുന്നത് ശ്രദ്ധയില്പെട്ട വീട്ടുകാര് നോക്കുമ്പോഴാണ് കുട്ടിയെ കണ്ടെത്തിയതെന്നും പോലീസ് പറഞ്ഞു. ചൊവ്വാഴ്ച വൈകുന്നേരം 5.30 മണിയോടെ വീടിനുള്ളില് കയറി ഒളിച്ചതായാണ് വിദ്യാര്ഥിനി പറഞ്ഞതെന്ന് പോലീസ് വ്യക്തമാക്കി. തുടര്ന്ന് പോലീസ് വൈദ്യപരിശോധനകള്ക്കായി കുട്ടിയെ പാമ്പാടി ആശുപത്രിയിലെത്തിച്ചു.
