അഗര്ത്തല : ധലായി ജില്ലയിലെ ഗന്ദാചെറ സ്റ്റേഷന് പരിധിയില് അഞ്ചു വയസുകാരിയെ പീഡിപ്പിച്ച കേസില് പ്രതിയായ 46 കാരനെ നാട്ടുകാരായ സ്ത്രീകള് തല്ലിക്കൊന്നു. ചൊവ്വാഴ്ച രാത്രിയാണ് ഗ്രാമത്തിലെ അഞ്ചുവയസുകാരി ബലാത്സംഗത്തിന് ഇരയായത്. അമ്മയോടൊപ്പം ഒരു ചടങ്ങില് പങ്കെടുക്കാനെത്തിയ പെണ്കുട്ടിയെ പ്രതി ഒപ്പം കൂട്ടിക്കൊണ്ടുപോവുകയായിരുന്നു. സമീപത്തെ കാട്ടിലെത്തിച്ച് പെണ്കുട്ടിയെ പീഡിപ്പിച്ച ശേഷം ഇയാള് കടന്നുകളഞ്ഞു. പിന്നീട് കുട്ടിയുടെ കരച്ചില് കേട്ടെത്തിയ സമീപവാസികളാണ് കുട്ടിയെ രക്ഷപ്പെടുത്തി ആശുപത്രിയിലാക്കിയത്.
സംഭവത്തിന് പിന്നാലെ കുട്ടിയെ അവസാനം കണ്ടത് പ്രതിക്കൊപ്പമാണെന്ന് നാട്ടുകാരും ആരോപിച്ചിരുന്നു. ഇയാളെ അറസ്റ്റ് ചെയ്യാന് സമരം ചെയ്ത നാട്ടുകാര് ദേശീയ പാത ഉപരോധിച്ചു. ഇതിന് പിന്നാലെയാണ് ഒരു കൂട്ടം സ്ത്രീകള് ഇയാളെ പിടികൂടി മരത്തില് കെട്ടിയിട്ട് മര്ദ്ദിച്ചത്. പിന്നീട് അബോധാവസ്ഥയിലായ ഇയാള്, ആശുപത്രിയില് എത്തവെ മരിച്ചു. കേസില് ആരെയും അറസ്റ്റ് ചെയ്തിട്ടില്ലെങ്കിലും, പോലീസ് കേസ് എടുത്തിട്ടുണ്ട്.
