തിരുവനന്തപുരം : കഴക്കൂട്ടത്ത് കെട്ടിട നിര്മ്മാണ സ്ഥലത്തുനിന്ന് ഇതര സംസ്ഥാന തൊഴിലാളിയുടെ മൊബൈല് ഫോണും പണവും കവര്ച്ച ചെയ്ത കേസിലെ പ്രതിയെ പോലീസ് പിടികൂടി. അണ്ടൂര്ക്കോണം ചിറവിളാകത്ത് പുതുവല്പുത്തന് വീട്ടില് ബിജു (34) വിനെയാണ് കഴക്കൂട്ടം പോലീസ് അറസ്റ്റ് ചെയ്തത്. കഴക്കൂട്ടം പോലീസ് സ്റ്റേഷന് പരിധിയില് ഇതര സംസ്ഥാന തൊഴിലാളികളുടെ ലേബര് ക്യാമ്പുകളില് നിന്നും കെട്ടിട നിര്മ്മാണ സ്ഥലങ്ങളില് നിന്നും മൊബൈല് ഫോണുകള് മോഷണം പോകുന്നതായി നിരവധി പരാതികള് ലഭിച്ചിരുന്നു.
ഇതിന്റെ അടിസ്ഥാനത്തില് പോലീസ് സി.സി.ടി.വി ദൃശ്യങ്ങള് പരിശോധിച്ചും മറ്റു ശാസ്ത്രീയ അന്വേഷണങ്ങളിലൂടെയുമാണ് പ്രതിയെ തിരിച്ചറിഞ്ഞ് പിടികൂടിയത്. കഴക്കൂട്ടം സൈബര് സിറ്റി അസി.കമീഷണര് ഹരി സി.എസിന്റെ നിര്ദേശപ്രകാരം കഴക്കൂട്ടം എസ്.എച്ച്.ഒ പ്രവീണ് ജെ.എസ്, എസ്ഐമാരായ മിഥുന്, ജിനു, എസ്.സി.പി.ഒ ബൈജു, സി.പി.ഒ മാരായ അരുണ് എസ് നായര്, ചിന്നു എന്നിവരടങ്ങിയ പോലീസ് സംഘമാണ് പ്രതിയെ അറസ്റ്റ് ചെയ്തത്. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
