തൃശ്ശൂര്‍: തൃശൂര്‍ ജില്ലയിലെ മരോട്ടിച്ചാലില്‍ ചായക്കടയില്‍ വെച്ച് 76 കാരന്റെ ഷര്‍ട്ടിന്റെ പോക്കറ്റില്‍ കിടന്ന് പൊട്ടിത്തെറിച്ചത് ഐ ടെല്‍ എന്ന കമ്പനിയുടെ ഫോണ്‍. ബനിയന്‍ ധരിച്ചിരുന്നത് കൊണ്ടാണ് അപകടത്തില്‍ 76കാരന് പരിക്കേല്‍ക്കാതെ രക്ഷപ്പെട്ടത്. ഷര്‍ട്ടിന്റെ പോക്കറ്റില്‍ നിന്ന് തീപടരുന്ന കണ്ട് വേഗത്തില്‍ തല്ലിക്കെടുത്തിയെന്നാണ് ഏലിയാസ് പറഞ്ഞത്. ഇന്ന് രാവിലെ പത്തരയോടെയാണ് സംഭവം നടന്നത്.
ബാറ്ററി പൊട്ടിത്തെറിച്ചതാണ് അപകടമുണ്ടാകാന്‍ കാരണമെന്ന് അദ്ദേഹം പറഞ്ഞു. ഒരു കൊല്ലം മുമ്പ് 1000 രൂപയ്ക്ക് വാങ്ങിയ ഫോണാണെന്നും ഐ ടെല്‍ എന്നാണ് കമ്പനിയുടെ പേരെന്നും വാറണ്ടി ഇല്ലായിരുന്നുവെന്നും ഏലിയാസ് വ്യക്തമാക്കി. ഈ സമയത്ത് ഷര്‍ട്ടില്‍ മുന്‍ഭാഗത്ത് ഇടത് വശത്തെ പോക്കറ്റില്‍ സൂക്ഷിച്ചിരുന്ന ഫോണ്‍ പൊട്ടിത്തെറിച്ച് തീ ആളിപ്പടരുകയായിരുന്നു. ഉടന്‍ തന്നെ തീ തല്ലിക്കെടുത്തിയതിനാല്‍ ഏലിയാസിന് അപായമൊന്നും ഉണ്ടായില്ല.
