കണ്ണൂര് : ജില്ല ആശുപത്രിയില് സ്ത്രീകളുടെ വാര്ഡില് വന് സുരക്ഷ വീഴ്ചയെന്ന് ആക്ഷേപം. കഴിഞ്ഞ ദിവസം പുലര്ച്ച വാര്ഡിലെ രോഗികളുടെയടക്കം ആറ് മൊബൈല് ഫോണുകളാണ് മോഷണം പോയത്. സ്ത്രീകളുടെയും ഗര്ഭിണികളുടെയും വാര്ഡുകളില് വാതിലുകള്ക്കും ജനലുകള്ക്കും കൃത്യമായ പൂട്ടോ മറ്റു സുരക്ഷ മാര്ഗങ്ങളോ ഇല്ലാത്ത അവസ്ഥയാണ്.
കഴിഞ്ഞ ദിവസം രാത്രി ആശുപത്രിയില് പ്രവേശിപ്പിച്ച ആറു പേരുടെ സ്മാര്ട്ട് ഫോണുകള് മോഷണം പേയതായാണ് പരാതി. അടച്ചുറപ്പില്ലാത്ത പഴയ കെട്ടിടത്തിലാണ് സ്ത്രീകളുടെ വാര്ഡ് പ്രവര്ത്തിക്കുന്നത്. ഉരുവച്ചാല് സ്വദേശിനിയായ മുംതാസ്, ഇവരുടെ മകള് മെഹറുന്നിസ, മുണ്ടേരിയിലെ മറിയംബി, ചേലോറയിലെ നസീമ, താഴെചൊവ്വയിലെ ഫാത്തിമ, അഴീക്കോട് ചാലിലെ രസിക എന്നിവരുടെ ഫോണുകളാണ് കവര്ന്നത്.
വെള്ളിയാഴ്ച പുലര്ച്ച രണ്ടിന് ശേഷമാണ് ഫോണുകള് നഷ്ടമായതെന്നാണ് ഇവര് കണ്ണൂര് സിറ്റി പോലീസില് നല്കിയ പരാതിയില് സൂചിപ്പിച്ചിരിക്കുന്നത്. രാത്രികാലങ്ങളിലടക്കം സ്ത്രീകളുടെ വാര്ഡിന് ചുറ്റും പുരുഷന്മാരുടെ സാന്നിധ്യമുള്ളതായി രോഗികള് പറയുന്നു. കൂടാതെ സ്ത്രീകള്ക്കുള്ള ശൗചാലയം പുരുഷന്മാരടക്കം ഉപയോഗിക്കുന്നതായും പരാതിയുണ്ട്.
