ചെറുതോണി: സഹപ്രവത്തകരെ പറ്റിച്ച് വന്തോതില് പലിശയും ലാഭവും വാഗ്ദാനം ചെയ്ത് ഒന്നരക്കോടിയുമായി മുങ്ങിയ പോലീസ്ക്കാരനെ അറസ്റ്റ് ചെയ്തു.കാഞ്ഞിരപ്പള്ളി പാറത്തോട് സ്വദേശി അമീര് ഷാ (43 )ആണ് തമിഴ്നാട്ടില് വെച്ച് അറസ്റ്റിലായത്.പോലീസ് സൊസൈറ്റിയില് നിന്നും 2017 -18 കാലയളവില് പോലീസ്ക്കാരായ സഹപ്രവര്ത്തകരെ കൊണ്ട് വായ്പ്പാ എടുപ്പിച്ചാണ് അമീര് തട്ടിപ്പ് നടത്തിയത്. അഞ്ചു ലക്ഷം മുതല് 25 ലക്ഷം രൂപവരെയാണ് ഇയാള് ഇതിലൂടെ കൈക്കലാക്കിയത്. 15000 മുതല് 25000 വരെ ലാഭവും സൊസൈറ്റിയില് അടക്കാനുള്ള പ്രതിമാസ തവണയും വാഗ്ദാനം ചെയ്താണ് സഹപ്രവര്ത്തകരില് നിന്നും ഇയാള് പണം വാങ്ങിയിരുന്നത്.
എന്നാല് ആറ് മാസത്തോളം കൃത്യമായി വായ്പ്പാ അടക്കുകയും ലാഭം നല്കുകയും ചെയ്തിരുന്നു. ഷെയര് മാര്ക്കറ്റില് നിക്ഷേപിക്കുന്നതിലൂടെയാണ് ലാഭം നല്കാനുള്ള തുക ലഭിക്കുന്നതെന്നാണ് അമീര് ഇടപാടുകാരെ വിശ്വസിപ്പിച്ചിരുന്നത്. ഒരു വര്ഷം കഴിഞ്ഞതോടെ ഇയാള് പണവുമായി മുങ്ങുകയായിരുന്നു. ഇതേതുടര്ന്ന് 2019 ല് ഇയാളെ സര്വീസില് നിന്നും പുറത്താക്കി. വകുപ്പ്തല നടപടി ഭയന്ന് തട്ടിപ്പിനിരയായവരില് പലരും പരാതിപ്പെട്ടിട്ടില്ല. പരാതിപ്രകാരം ഒന്നരക്കോടിയോളം രൂപയാണ് അമീര് തട്ടിയെടുത്തത്. അന്വേഷണത്തിനിടയാണ് പ്രതി മുങ്ങുന്നത്. ഒടിവില് ഇടുക്കി ഡി.സി.ആര്.ബി കേസ് അന്വേഷണം ഏറ്റെടുത്തു. ഡി.സി.ആര്.ബി. ഡിവൈ.എസ്.പി. ക്ക് ലഭിച്ച രഹസ്യ വിവരത്തെത്തുടര്ന്നാണ് അമീറിനെ തമിഴ്നാട്ടില് വെച്ച് അറസ്റ്റ് ചെയ്യുന്നത്.
