മാന്നാര് : വാഹനപരിശോധനക്കിടെ നിര്ത്താതെ വെട്ടിച്ചു കടന്ന കാര് പിന്തുടര്ന്ന് കസ്റ്റഡിയിലെടുത്തത് പോലീസ്. കാര് ഓടിച്ചിരുന്ന കാര്ത്തികപ്പള്ളി സ്വദേശി പ്രവീണ് രാജിനെതിരെ കേസെടുത്തു. ചെന്നിത്തല കോട്ടമുറി ഭാഗത്ത് കഴിഞ്ഞദിവസം രാവിലെയാണ് സംഭവം. മാന്നാര് പോലീസ് വാഹനപരിശോധന നടത്തുമ്പോള്, മൊബൈല് ഫോണില് സംസാരിച്ചുകൊണ്ട് പ്രവീണ് രാജ് ഓടിച്ചുവന്ന കാര് ഗ്രേഡ് എസ്.ഐ ഹരിദാസ് കൈകാണിച്ചു നിര്ത്തിച്ചു.
കാറിന്റെ മുന്ഭാഗത്തെയും പിന്നിലെയും നമ്പര് പ്ലേറ്റുകള് തമ്മില് വ്യത്യാസമുള്ളതായി പോലീസിന്റെ ശ്രദ്ധയില്പ്പെട്ടു. നമ്പര് പ്ലേറ്റിനു മുകള് വശത്തായി ചെയര്മാന് സനാതന വേദപാഠശാല എന്ന ബോര്ഡും ഘടിപ്പിച്ചിരുന്നു. വിശദമായ പരിശോധനക്കായി വാഹനത്തിന്റെ രേഖകള് ചോദിച്ചപ്പോള് കാറിനുള്ളില് കയറിയ പ്രവീണ് അമിത വേഗതയില് കാര് മുന്നോട്ട് എടുത്ത് പോലീസിനെ വെട്ടിച്ചു കടന്നു. അപകടകരമായ വേഗതയില് പോയ വാഹനത്തെ മാന്നാര് പോലീസ് പിന്തുടര്ന്ന് മാവേലിക്കര ശ്രീകൃഷ്ണസ്വാമി ക്ഷേത്രത്തിന് സമീപം വച്ച് പിടികൂടുകയുമായിരുന്നു. തുടര്ന്ന് പ്രവീണിനെ പിന്നീട് ജാമ്യത്തില് വിട്ടയച്ചു.
