കടുത്തുരുത്തി : ഞീഴൂര് പഞ്ചായത്തിലെ പത്താം വാര്ഡില് പ്രവര്ത്തിക്കുന്ന വിളയങ്കോട് പബ്ലിക് ലൈബ്രറിക്ക് പുതിയ കെട്ടിടം നിര്മ്മിക്കുന്നതിന് എംപിയുടെ പ്രാദേശിക വികസന ഫണ്ടില് നിന്നും 15 ലക്ഷം രൂപ അനുവദിച്ചതായി തോമസ് ചാഴികാടന് എം പി അറിയിച്ചു. ഇതിന് ഭരണാനുമതി അടക്കമുള്ള നടപടികള് പൂര്ത്തിയാക്കിയതായി അദ്ദേഹം അറിയിച്ചു. നിലവില് ഉള്ള കെട്ടിടം കാലപഴക്കം കൊണ്ട് ജീര്ണാവസ്ഥയില് ആയതിനാല് പുസ്തകങ്ങള്, ഫര്ണിച്ചറുകള് എന്നിവ ഉപയോഗശൂന്യമായി കൊണ്ടിരിക്കുകയാണ്.
പഞ്ചായത്തിന്റെ ഗ്രാമ കേന്ദ്രവും മറ്റു പ്രധാന പരിപാടികളും ഈ കെട്ടിടത്തിലാണ് ഇപ്പോള് നടത്തുന്നത്. ലൈബ്രറിയുടെ കൈവശമുള്ള 3 സെന്റ് സ്ഥലത്താണ് എംപി ഫണ്ട് ഉപയോഗിച്ച് എല്ലാവിധ സൗകര്യങ്ങളോടും കൂടിയ പുതിയ കെട്ടിടം നിര്മ്മിക്കുന്നത്. ഇക്കാര്യം ആവശ്യപ്പെട്ട് കടുത്തുരുത്തി ബ്ലോക്ക് പഞ്ചായത്ത് മെമ്പര് ജോണ്സണ് കൊട്ടുകാപ്പള്ളി, സി സി ജോസഫ് എന്നിവര് എം പി ക്ക് നിവേദനം നല്കിയിരുന്നു.
