കാസര്കോട് : ജില്ലയിലെ പ്ലസ് വണ് സീറ്റ് പ്രതിസന്ധി പരിഹരിക്കണമെന്ന് ആവശ്യപ്പെട്ട് എം.എസ്.എഫ് കളക്ടറേറ്റിലേക്ക് നടത്തിയ മാര്ച്ചില് സംഘര്ഷം. പോലീസ് ജലപീരങ്കി പ്രയോഗിച്ചതിനെ തുടര്ന്ന് പ്രവര്ത്തകര് റോഡ് ഉപരോധിച്ചു. പോലീസും പ്രതിഷേധക്കാരും തമ്മില് പ്രദേശത്ത് മണിക്കൂറുകള് നീണ്ട സംഘര്ഷാവസ്ഥ. പത്താംതരം പാസായ മുഴുവന് പേര്ക്കും പ്ലസ് വണ് സീറ്റ് ലഭ്യമാക്കണമെന്നാവശ്യപ്പെട്ട് എം.എസ്.എഫ് ജില്ല കമ്മിറ്റിയാണ് മാര്ച്ച് നടത്തിയത്. ആയിരത്തോളം പേര് പങ്കെടുത്ത മാര്ച്ച് കലക്ടറേറ്റിന് മുന്നില് പോലീസ് തടഞ്ഞു.
തുടര്ന്ന് സമരക്കാരില് ചിലര് ബാരിക്കേഡിലേക്ക് തള്ളിക്കയറാന് ശ്രമിച്ചു. ഇതോടെ, പോലീസും സമരക്കാരും തമ്മില് ഉന്തും തള്ളുമായി. തുടര്ന്ന് പോലീസ് ജലപീരങ്കി പ്രയോഗിച്ചു. ഇതില് പ്രതിഷേധിച്ച് സമരക്കാര് ദേശീയപാത ഉപരോധിച്ചു. മുസ്ലിം ലീഗ്, യൂത്ത് ലീഗ് നേതാക്കളെത്തിയാണ് പ്രതിഷേധക്കാരെ പിന്തിരിപ്പിച്ചത്. മാര്ച്ച് യൂത്ത് ലീഗ് അഖിലേന്ത്യാ ജനറല് സെക്രട്ടറി അഡ്വ.ഫൈസല് ബാബു ഉദ്ഘാടനം ചെയ്തു. എം.എസ്.എഫ് ജില്ല പ്രസിഡന്റ് അനസ് എതിര്ത്തോട് അധ്യക്ഷത വഹിച്ചു. ജനറല് സെക്രട്ടറി ഇര്ഷാദ് മൊഗ്രാല് സ്വാഗതം പറഞ്ഞു.
എം.എസ്.എഫ് സംസ്ഥാന സെക്രട്ടറി ആബിദ് ആറങ്ങാടി, ഹരിത സംസ്ഥാന വൈസ് പ്രസിഡന്റ് ഷാഹിദ റാഷിദ്, അസ്ഹറുദ്ദീന് മണിയനോടി, സഹദ് അംഗഡിമൊഗര്, നഷാത്ത് പരവനടുക്കം, ജാബിര് തങ്കയം, റംഷീദ് തോയമ്മല്, സിദ്ദീഖ് മഞ്ചേശ്വര്, സലാം ബെളിഞ്ചം, അഷ്റഫ് ബോവിക്കാനം, താഹ തങ്ങള്, റഹീം പള്ളം തുടങ്ങിയവര് നേതൃത്വം നല്കി.
