കോഴിക്കോട് : മുഖ്യമന്ത്രി പിണറായി വിജയന് എതിരായ പരാമര്ശത്തില് കെ. സുധാകരനെ പിന്തുണച്ച് കെ.പി.സി.സി. അധ്യക്ഷന് മുല്ലപ്പള്ളി രാമചന്ദ്രന്. സുധാകരന് ജാതീയമായ പരാമര്ശം നടത്തിയിട്ടില്ലെന്ന് അദ്ദേഹം പറഞ്ഞു. ഒരു കുലത്തൊഴിലുമായി ബന്ധപ്പെട്ട് ആരെയും അവഹേളിക്കാനോ ആക്ഷേപിക്കാനോ സുധാകരന് തയ്യാറായിട്ടില്ലെന്നും മുല്ലപ്പള്ളി കോഴിക്കോട്ട് മാധ്യമങ്ങളോടു പ്രതികരിച്ചു.
ഇപ്പോള് ഉയര്ന്ന വിവാദം അര്ഥശൂന്യമാണ്. കമ്യൂണിസ്റ്റ് പാര്ട്ടി വിഷയദാരിദ്ര്യം അനുഭവിക്കുകയാണെന്നും അതിനാല് ഏതെങ്കിലും ഒരു വിഷയം ഉയര്ത്തി കേരളരാഷ്ട്രീയത്തില് വിവാദം സൃഷ്ടിക്കാന് ശ്രമിക്കുകയാണെന്നും മുല്ലപ്പള്ളി പറഞ്ഞു. പാര്ട്ടിയെയും പ്രവര്ത്തകരെയും വിമര്ശിച്ചുകൊണ്ടുള്ള സുധാകരന്റെ ഇന്നലത്തെ പരാമര്ശത്തെക്കുറിച്ചുള്ള ചോദ്യത്തിന് ആ രൂപത്തിലൊന്നും പറയുന്ന ആളല്ല അദ്ദേഹം എന്നായിരുന്നു മുല്ലപ്പള്ളിയുടെ മറുപടി.
തികഞ്ഞ ഉത്തരവാദിത്തബോധമുള്ള കോണ്ഗ്രസ് നേതാവാണ് സുധാകരന്. പാര്ട്ടിയെ സ്നേഹിക്കുന്ന ആളാണ്. പാര്ട്ടിയെ സംരക്ഷിക്കാനുള്ള ശ്രമത്തിലാണ് സുധാകരന് എപ്പോഴും വ്യാപൃതനായിട്ടുള്ളത്. അദ്ദേഹത്തിന്റെ പോരാട്ടം ഈ നാട്ടിലെ ആയിരക്കണക്കിന് കോണ്ഗ്രസുകാര്ക്ക് ആവേശമുണ്ടാക്കുന്ന പോരാട്ടമാണ്. സി.പി.എമ്മുമായാണ് അദ്ദേഹം മുഖാമുഖം പോരാടിക്കൊണ്ടിരിക്കുന്നത്. അത് ലാഘവബുദ്ധിയോടെ കാണരുത്. അദ്ദേഹം കോണ്ഗ്രസിന്റെ കരുത്തനായ പടയാളിയാണെന്നും മുല്ലപ്പള്ളി കൂട്ടിച്ചേര്ത്തു.
