ജാര്ഖണ്ഡ് : ആഭിചാരക്രിയകള് നടത്തിയെന്ന് ആരോപിച്ച് 60 കാരിയെ അയല്വാസികള് തീകൊളുത്തി. നാട്ടുകാര് അറിയിച്ചതനുസരിച്ച് കുതിച്ചെത്തിയ പോലീസാണ് സ്ത്രീയുടെ ജീവന് രക്ഷിച്ചത്. 40 ശതമാനം പൊള്ളലേറ്റ് അവര് ചികിത്സയിലാണ്. ജാര്ഖണ്ഡിലെ സിംഡേഗ ജില്ലയിലെ ദീപടോലി ഗ്രാമത്തിലായിരുന്നു സംഭവം. സംഭവത്തില് ആറ് പേരെ അറസ്റ്റ് ചെയ്തതായി പോലീസ് അറിയിച്ചു. 60കാരിയായ ജാരിയൊ ദേവിയെയാണ് ഒരു സംഘമാളുകള് ചേര്ന്ന് ആക്രമിച്ച ശേഷം തീകൊളുത്തിയത്.
അയല്വാസിയായ ഫ്ലോറന്സിന്റെ ഭാര്യയുടെ മരണശേഷമുള്ള പരിപാടിയില് പങ്കെടുക്കുകയായിരുന്നു ജാരിയൊ ദേവി. ചടങ്ങിനിടെ, ജാരിയൊ ദേവിയുടെ ആഭിചാരക്രിയകള് കാരണമാണ് തന്റെ ഭാര്യ മരിച്ചതെന്ന് ഫ്ലോറന്സ് ആരോപിക്കുകയായിരുന്നു. തുടര്ന്ന് അവരെ മര്ദിക്കാന് തുടങ്ങി. മറ്റു അഞ്ച് ആളുകള് കൂടി അയോളോടൊപ്പം കൂടി. പിന്നീട് മണ്ണെണ്ണ ഒഴിച്ച് തീകൊളുത്തുകയായിരുന്നുവെന്ന് പോലീസ് പറഞ്ഞു. മറ്റു നാട്ടുകാര് അറിയിച്ചതനുസരിച്ച് പോലീസ് കുതിച്ചെത്തിയാണ് ജാരിയൊ ദേവിയെ രക്ഷിച്ചത്. അപ്പോഴേക്കും 40 ശതമാനം പൊള്ളലേറ്റിരുന്നു. ഫ്ലോറന്സ് ഉള്പ്പെടെയുള്ള ആറ് പേരെയാണ് പോലീസ് അറസ്റ്റ് ചെയ്തത്.