കണ്ണൂര് : കണ്ണൂര് നഗരത്തിലെ റെഡിമെയ്ഡ് കടയിലെ ജീവനക്കാരനെ അതേ സ്ഥാപനത്തിലെ മറ്റൊരു ജീവനക്കാരന് ഹെല്മെറ്റ് കൊണ്ടടിച്ച് അപായപ്പെടുത്താന് ശ്രമിച്ചതായി കേസ്. തയ്യല് സ്വദേശിയായ പൂവളപ്പില് ഹൗസില് പി.സഫറുദ്ദീനാണ് (20) മര്ദ്ദനമേറ്റത്. ഇയാളുടെ പരാതിയില് റബീറിനെതിരെയാണ് ടൗൺ പോലീസ് കേസ്സെടുത്തത്.
ഞായറാഴ്ച്ച രാത്രി ഏഴു മണിയോടെ സമീപത്തെ കടയിലെ ആളുമായി വഴക്കിടുന്നതിനിടെ തടയാന് ശ്രമിച്ചപ്പോഴാണ് സഫറുദ്ദീനെ റബീര് ഹെല്മെറ്റ് കൊണ്ടടിച്ച് പരിക്കേല്പ്പിച്ചത്. എതിര്കക്ഷിക്കെതിരെ വധശ്രമമുള്പ്പെടെയുള്ള വകുപ്പുകള് ചുമത്തിയാണ് കേസെടുത്തിട്ടുള്ളത്. നേരത്തെ കണ്ണൂര് നഗരത്തിലെ ഹോട്ടല്വ്യാപാരിയെ കുത്തിക്കൊന്ന കേസിലെ പ്രതിയാണ് റബീര്. ഇയാള്ക്ക് മയക്കുമരുന്ന് മാഫിയയുമായി ബന്ധമുണ്ടെന്ന് സംശയിക്കുന്നതായി പോലിസ് പറഞ്ഞു. സംഭവത്തിനു ശേഷംപ്രതി ഒളിവിലാണ്.
