മഹാരാഷ്ട്ര : അഭിഭാഷകന്റെ മൃതദേഹം വീട്ടില് കത്തിക്കരിഞ്ഞ നിലയില് കണ്ടെത്തിയ സംഭവത്തില് ഭാര്യയും ആണ്സുഹൃത്തും അറസ്റ്റില്. അഭിഭാഷകനായ കിരണ് ലോഖണ്ഡെയെ കൊലപ്പെടുത്തിയ കേസിലാണ് ഭാര്യ മനീഷ ലോഖണ്ഡെ (21), ബദ്നാപൂര് സ്വദേശിയായ ഗണേഷ് മിട്ടു അഗ്ലാവെ (23) എന്നിവരെ പോലീസ് അറസ്റ്റ് ചെയ്തത്. ഓഗസ്റ്റ് 30ന് ഗണേഷിന്റെ സഹായത്തോടെ മനീഷ ഭര്ത്താവിനെ വടികൊണ്ട് അടിക്കുകയും കഴുത്ത് ഞെരിച്ച് കൊലപ്പെടുത്തുകയുമായിരുന്നു.
സെപ്റ്റംബര് ഒന്നിന് അംബാദ് റോഡിലെ വീട്ടില് കത്തിക്കരിഞ്ഞ നിലയിലാണ് കിരണ് ലോഖണ്ഡെയുടെ മൃതദേഹം കണ്ടെത്തിയത്. ഗ്യാസിന് ചോര്ച്ചയുണ്ടായതിനെ തുടര്ന്ന് എല്പിജി സ്വിച്ച് ഓഫ് ചെയ്യാന് ശ്രമിക്കുന്നതിനിടെ സിലിണ്ടര് പൊട്ടിത്തെറിക്കുകയായിരുന്നുവെന്നാണ് മനീഷ പോലീസിന് നല്കിയ മൊഴി. തുടര്ന്ന് അസ്വാഭാവിക മരണത്തിന് പോലീസ് കേസെടുത്തു.
ഇതിനിടെ, ജല്ന വക്കീല് സംഘ് എന്ന അഭിഭാഷക സംഘടന പോലീസ് സൂപ്രണ്ട് വിക്രാന്ത് ദേശ്മുഖിനെ കണ്ട് മരണത്തില് സമഗ്രമായ അന്വേഷണം നടത്തണമെന്ന് ആവശ്യപ്പെടുകയും ചെയ്തു. സിസിടിവി ദൃശ്യങ്ങള് പരിശോധിച്ച പോലീസ് മനീഷയുടെ കോള് റെക്കോഡുകള് ശേഖരിച്ചു. പരിശോധനയില് സുഹൃത്തായ ഗണേഷുമായി മനീഷ പതിവായി ഫോണിലൂടെ ബന്ധപ്പെടാറുണ്ടായിരുന്നുവെന്ന് പോലീസ് കണ്ടെത്തി.
