നെടുമ്പാശേരി : ജാമ്യവ്യവസ്ഥലംഘിച്ച് വീണ്ടും കുറ്റകൃത്യത്തിലേര്പ്പെട്ട കൊലക്കേസ് പ്രതിയുടെ ജാമ്യം റദ്ദാക്കി ജയിലിലടച്ചു. നെടുമ്പാശേരി തിരുവിലാംകുന്ന് കിഴക്കേടത്ത് വീട്ടില് ലാല് കിച്ചുവിന്റെ (34) ജാമ്യമാണ് റദ്ദാക്കിയത്. അത്താണിയില് ബിനോയി എന്നയാളുടെ കൊലപാതകവുമായി ബന്ധപ്പെട്ട് നേരത്തെ ഇയാളെ അറസ്റ്റുചെയ്തിരുന്നു. തുടര്ന്ന് കോടതി ഉപാധികളോടെ ജാമ്യം നല്കി. ഇത് ലംഘിച്ച് നെടുമ്പാശേരിയിലെ ഒരുബാറില് അതിക്രമിച്ച് കയറി പണമാവശ്യപ്പെടുകയും വധഭീഷണി മുഴക്കുകയും ചെയ്ത കേസില് പ്രതിയായതിനെത്തുടര്ന്നാണ് ജാമ്യം റദ്ദാക്കിയത്.
ജില്ലാ പോലീസ് മേധാവി കെ. കാര്ത്തിക്കിന്റെ നിര്ദ്ദേശാനുസരണം ബന്ധപ്പെട്ട കോടതിയില് റിപ്പോര്ട്ട് സമര്പ്പിച്ചതിന്റെ അടിസ്ഥാനത്തിലാണ് നടപടി. നിരന്തരം കുറ്റകൃത്യങ്ങളിലേര്പ്പെടുന്നവരുടെ പട്ടിക തയ്യാറാക്കി ഇവര് ജാമ്യവ്യവസ്ഥകള് ലംഘിച്ച് വീണ്ടും കുറ്റകൃത്യങ്ങളിലേര്പ്പെടുന്നുണ്ടോയെന്ന് നിരീക്ഷിച്ച് വരികയാണെന്ന് എസ്.പി കെ. കാര്ത്തിക് പറഞ്ഞു.
