മാവേലിക്കര : ചെളിവെള്ളം ഓട്ടോറിക്ഷയില് തെറിപ്പിച്ച വിരോധത്തില് ഗൃഹനാഥനെ തിരുവോണനാളില് സംഘം ചേര്ന്ന് ആക്രമിച്ചു കൊലപ്പെടുത്തിയ കേസില് പ്രതികള്ക്ക് ശിക്ഷ വിധിച്ചു. 2 പേര്ക്കു ജീവപര്യന്തം തടവും ഒരു ലക്ഷം രൂപ വീതം പിഴയുമാണ് അഡീഷനല് ജില്ലാ സെഷന്സ് ജഡ്ജി വി.ജി ശ്രീദേവിയാണ് ശിക്ഷ വിധിച്ചത്. ചാരുംമൂട് താമരക്കുളം കാഞ്ഞിത്തറ തെക്കേതില് സെനില്രാജ് (37), അനില് ഭവനം അനില് (40) എന്നിവര്ക്കാണ് ജീവപര്യന്തം തടവും ഒരു ലക്ഷം രൂപ പിഴയും വിധിച്ചത്.
താമരക്കുളം വൈശാഖ് വീട്ടില് വേണുഗോപാല് (51) ആണ് കൊല ചെയ്യപ്പെട്ടത്. റോഡിലെ കുഴിയില് വീണ കാര് ഓട്ടോറിക്ഷയില് ചെളി വെള്ളം തെറിപ്പിച്ചെന്ന് പറഞ്ഞായിരുന്നു ആക്രമണം. പിഴയടച്ചില്ലെങ്കില് 6 മാസം അധികം കഠിനതടവ് അനുഭവിക്കണം. പിഴത്തുക കൊല്ലപ്പെട്ട വേണുഗോപാലിന്റെ ഭാര്യ ഉഷ വേണുഗോപാലിനു നല്കാനും കോടതി ഉത്തരവായി. കേസിലെ മൂന്നാം പ്രതി മാന്നാര് കുട്ടംപേരൂര് കരിയില് കിഴക്കേതില് സുഭാഷ് വിചാരണയ്ക്കിടെ മരിച്ചിരുന്നു.
