ജയ്പുര്‍ : പണമിടപാടിനെ ചൊല്ലിയുണ്ടായ തര്‍ക്കത്തിനു പിന്നാലെ ദലിത് അധ്യാപികയെ ബന്ധുക്കള്‍ തീ കൊളുത്തി കൊന്നു. രാജസ്ഥാനിലെ ജയ്പുരില്‍ റെയ്സര്‍ പോലീസ് സ്റ്റേഷന്‍ പരിധിയിലാണ് സംഭവം. സ്വകാര്യ സ്കൂളിലെ അധ്യാപികയായ അനിത (35) ആണ് മരിച്ചത്. വായ്പ നല്‍കിയ പണം തിരിച്ചുചോദിച്ചതിനെ ചൊല്ലിയുണ്ടായ തര്‍ക്കമാണ് കൊലയില്‍ കലാശിച്ചതെന്ന് ജയ്പുര്‍ റൂറല്‍ എസ്.പി മനീഷ് അഗര്‍വാള്‍ പറഞ്ഞു. അധ്യാപിക ബന്ധുക്കള്‍ക്ക് പണം വായ്പ കൊടുത്തിരുന്നു.
കഴിഞ്ഞദിവസം ഈ പണം തിരികെ ചോദിച്ചതിനെ ചൊല്ലി തര്‍ക്കമുണ്ടായി. പിന്നാലെ സ്ത്രീകള്‍ ഉള്‍പ്പെടെയുള്ളവര്‍ അധ്യാപികയെ മര്‍ദിക്കുകയും പെട്രോള്‍ ഒഴിച്ച്‌ തീ കൊളുത്തുകയുമായിരുന്നു. ഗുരുതരമായി പൊള്ളലേറ്റ അധ്യാപിക ജയ്പുരിലെ എസ്.എം.എസ് ആശുപത്രിയില്‍ ചികിത്സയിലിരിക്കെയാണ് മരിച്ചത്. യുവതിയുടെ പരാതിയില്‍ ബന്ധുക്കള്‍ക്കെതിരെ കേസെടുത്തെങ്കിലും ഇതുവരെ അറസ്റ്റ് ചെയ്തിട്ടില്ല. സംസ്ഥാനത്തെ ക്രമസമാധാന നില തകര്‍ന്നെന്നും അശോക് ഗെഹ്ലോട്ടിന്റെ നേതൃത്വത്തിലുള്ള കോണ്‍ഗ്രസ് സര്‍ക്കാര്‍ പൂര്‍ണ പരാജയമാണെന്നും ബി.ജെ.പി സംസ്ഥാന അധ്യക്ഷന്‍ സതീഷ് പൂനിയ കുറ്റപ്പെടുത്തി.
