കോഴിക്കോട് : മുട്ടില് മരംമുറികേസില് നിര്ണായക കണ്ടെത്തലുകള് നടത്തിയ ഉദ്യോഗസ്ഥനെ സ്ഥലംമാറ്റി. കണ്ണൂര് സിസിഎഫ് ആയ ഡി.കെ.വിനോദ് കുമാറിനാണ് സ്ഥലംമാറ്റം ലഭിച്ചത്. കൊല്ലം സോഷ്യല് ഫോറസ്ട്രി കണ്സര്വേറ്ററായാണ് അദ്ദേഹത്തിന് നിയമനം. ഇതൊരു അപ്രധാന തസ്തികയാണ്. എന്നാല് മുട്ടില് മരംമുറി കേസില് പ്രതികള്ക്ക് വേണ്ടി അന്വേഷണ ഉദ്യോഗസ്ഥര്ക്കെതിരെ ഗൂഢാലോചന നടത്തിയതിന് അന്വേഷണം നേരിടുന്ന ഉദ്യോഗസ്ഥന് പ്രമോഷന് ലഭിച്ചു. എന്.ടി സാജനെ ദക്ഷിണമേഖലാ വനം സര്ക്കിള് മേധാവിയായാണ് നിയമിച്ചിരിക്കുന്നത്.
വനം വകുപ്പ് ആസ്ഥാനത്തുനിന്ന് ശുപാര്ശയില്ലാതെയും സിവില് സര്വീസസ് ബോര്ഡിന്റെ അനുമതിയില്ലാതെയും ആണ് സ്ഥലംമാറ്റം എന്നാണ് സൂചന. സ്ഥലം മാറ്റത്തില് പ്രതിഷേധവുമായി വനം വകുപ്പിലെ ഉന്നത ഉദ്യോഗസ്ഥന് ചീഫ് സെക്രട്ടറിയെ കണ്ടു. സ്ഥലംമാറ്റ ഉത്തരവിനെതിരെ സെന്ട്രല് അഡ്മിനിസ്ട്രേറ്റീവ് ട്രിബ്യൂണലിനെ സമീപിക്കാന് ഒരുങ്ങുകയാണ് സ്ഥലം മാറ്റപ്പെട്ട ഐഎഫ്എസ് ഉദ്യോഗസ്ഥരില് ചിലര്.
ദക്ഷിണമേഖലാ ചീഫ് കണ്സര്വേറ്റര് സഞ്ജയന് കുമാര്, സിസിഎഫുമാരുടെ ചുമതല കൂടി വഹിക്കുന്ന ഉത്തരമേഖലാ ഡപ്യൂട്ടി കണ്സര്വേറ്റര് ഡി.കെ.വിനോദ് കുമാര്, കൊല്ലം സോഷ്യല് ഫോറസ്ട്രി ഡപ്യൂട്ടി കണ്സര്വേറ്റര് എന്.ടി.സാജന്, കോഴിക്കോട് സോഷ്യല് ഫോറസ്ട്രി ഡപ്യൂട്ടി കണ്സര്വേറ്റര് ആര്.കീര്ത്തി എന്നിവരെയാണ് പരസ്പരം സ്ഥലം മാറ്റി ഉത്തരവിറക്കിയത്.
സഞ്ജയന് കുമാറിനെ വര്ക്കിങ് പ്ലാനിലേക്കും വിനോദ് കുമാറിനെ കൊല്ലം സോഷ്യല് ഫോറസ്ട്രിയിലേക്കും എന്.ടി.സാജനെ ദക്ഷിണമേഖലാ സിസിഎഫിന്റെ ചുമതല നല്കിയും ആര്.കീര്ത്തിയെ ഉത്തരമേഖലയിലേക്കുമാണ് മാറ്റിയത്. ഇവര് നിലവിലെ തസ്തികകളില് എത്തിയിട്ട് രണ്ട് വര്ഷത്തില് താഴെയേ ആയിട്ടുള്ളു.
രണ്ടു വര്ഷം തികയുന്നതിനു മുന്പ് ഐഎഫ്എസ് ഉദ്യോഗസ്ഥരെ സ്ഥലം മാറ്റണമെങ്കില് സിവില് സര്വീസസ് ബോര്ഡ് യോഗം ചേര്ന്ന് ഉദ്യോഗസ്ഥരുടെ ഭാഗം കൂടി കേള്ക്കണം. സിഎസ്ബിയുടെ ശുപാര്ശ സര്ക്കാരിനു തള്ളുകയോ അംഗീകരിക്കുകയോ ചെയ്യാം. എന്നാല് ഇത്തരം നടപടിക്രമങ്ങളൊന്നും പാലിക്കാതെയാണ് നാലു സ്ഥലം മാറ്റങ്ങളുമെന്നാണ് പരാതി.
മുട്ടില് മരം മുറി വിവാദത്തോട് അനുബന്ധിച്ച് ഉണ്ടായ മണിക്കുന്ന് മല മരം മുറി സംഭവത്തില് എന്.ടി.സാജനെതിരെ അന്വേഷണ റിപ്പോര്ട്ട് തയാറാക്കിയത് ഉത്തരമേഖലാ സിസിഎഫ്: ഡി.കെ.വിനോദ് കുമാറാണ്. ദക്ഷിണമേഖലാ സര്ക്കിള് സിസിഎഫിന്റെ ചുമതലയോടു കൂടി സാജനെ കൊല്ലത്തുതന്നെ ഉയര്ന്ന തസ്തികയില് നിയമിക്കുമ്പോള് സോഷ്യല് ഫോറസ്ട്രി ഡിസിഎഫ് ആയി കൊല്ലത്തേക്ക് എത്തുന്ന വിനോദ് കുമാര് സാജന് കീഴിലാവും.
വിരമിക്കാന് ആറു മാസം ശേഷിക്കുന്ന സാജന് ഭാവിയില് ഉത്തരമേഖല സിസിഎഫ് ചുമതലയിലേക്കു സ്ഥലം മാറ്റം നല്കാനുള്ള കുറുക്കുവഴിയാണ് ഇതെന്നും വകുപ്പിനുള്ളില്നിന്നു സൂചനകള് പുറത്തു വരുന്നു. നേരത്തേ സാജനെ കോഴിക്കോട്ടേക്ക് തിരികെ നിയമിക്കാന് ശുപാര്ശ മുഖ്യമന്ത്രിയുടെ ഓഫീസില്നിന്ന് പുറപ്പെട്ടപ്പോള് വനം മന്ത്രിയാണ് തടഞ്ഞത്. മരം മുറി വിവാദത്തില് അന്വേഷണം നടക്കുമ്പോള് ഈ ഉദ്യോഗസ്ഥനെ കോഴിക്കോട്ടേക്ക് തിരികെ നിയമിക്കുന്നത് തെറ്റായ സന്ദേശം നല്കുമെന്ന് മന്ത്രി ഫയലില് കുറിച്ചിരുന്നു. ആ നീക്കം തടസ്സപ്പെട്ടതിനു പിന്നാലെയാണ് ഇപ്പോഴത്തെ സ്ഥലം മാറ്റം.
