വടകര : അഴിയൂർ – വെങ്ങളം ദേശീയപാത ആറുവരിയായി വികസിപ്പിക്കുമ്പോൾ ഉണ്ടായേക്കാവുന്ന ഗതാഗതപ്രശ്നം പരിഹരിക്കാനുള്ള ബദൽമാർഗങ്ങളെക്കുറിച്ച് ഇപ്പോൾത്തന്നെ രൂപരേഖ തയ്യാറാക്കണമെന്ന ആവശ്യം ശക്തമാകുന്നു. ദേശീയപാതാവികസനവുമായി ബന്ധപ്പെട്ട് വടകരയിൽ രൂപവത്കരിച്ച പൗരസമൂഹ കൂട്ടായ്മയും ഈ വിഷയം ബന്ധപ്പെട്ട തദ്ദേശസ്ഥാപനങ്ങളുടെയും മറ്റും ശ്രദ്ധയിൽപ്പെടുത്തിയിരുന്നു.
ഉൾനാടൻറോഡുകളുടെ അറ്റകുറ്റപ്പണി ഉൾപ്പെടെയുള്ളവ പെട്ടെന്നുതന്നെ നടത്തിയാൽ മാത്രമേ ദേശീയപാതയെ ഗതാഗതക്കുരുക്കിൽനിന്ന് രക്ഷപ്പെടുത്താനാവൂ എന്ന അഭിപ്രായമാണ് ഉയരുന്നത്. കുരുക്കുണ്ടായാൽ എങ്ങിനെയൊക്കെ ഗതാഗതം തിരിച്ചുവിട്ട് പ്രശ്നം പരിഹരിക്കാം എന്നതിനെക്കുറിച്ചും വ്യക്തമായ ധാരണ വേണം. ബദൽഗതാഗതത്തിന് തിരഞ്ഞെടുക്കുന്ന റോഡുകളുടെ നിലവാരവും ഉറപ്പാക്കേണ്ടതുണ്ട്. ഇതിനായി ബന്ധപ്പെട്ടവർ ഉടൻതന്നെ യോഗംചേർന്ന് രൂപരേഖ ഉണ്ടാക്കണമെന്നാണ് ആവശ്യം.