കാബൂള് : കാസര്കോട് സ്വദേശി കന്യാസ്ത്രീ നാട്ടിലേക്കുള്ള മടക്കവും കാത്ത് കാബൂളില്. സീതാംഗോളി ബേളയിലെ സിസ്റ്റര് തെരേസ ക്രാസ്ത(48)യാണ് കാബൂളില് വിമാനത്താവളത്തില് നിന്ന് 15 മിനിറ്റ് യാത്രാ ദൂരത്തുള്ള സ്കൂളില് കഴിയുന്നത്. ആഗസ്റ്റ് 17ന് സ്കൂളടച്ച് ഇറ്റലി വഴി നാട്ടിലേക്ക് മടങ്ങാനായിരുന്നു ഇവരുടെ പദ്ധതി. എന്നാല് വിമാനത്താവളം അടച്ചതോടെ സിസ്റ്റര് തെരേസയും പാക്കിസ്ഥാനില് നിന്നുള്ള സിസ്റ്ററും മടങ്ങാനാവാതെ കാബൂളില് കുടുങ്ങി. കൂടെയുണ്ടായിരുന്ന ഇറ്റലിക്കാരിയായ മറ്റൊരു സിസ്റ്റര് നേരത്തെ മടങ്ങിയിരുന്നു.
ഫ്രാന്സിസ് മാര്പാപ്പയുടെ ക്ഷണം സ്വീകരിച്ചാണ് യുദ്ധഭൂമിയിലും മറ്റും ദുരിതമനുഭവിക്കുന്നവര്ക്കു വേണ്ടി സന്നദ്ധ പ്രവര്ത്തനം നടത്താന് 2017ല് സിസ്റ്റല് തെരേസ ഇറ്റലിയിലേക്ക് പറന്നത്. അതു വരെ മംഗളൂരു ആസ്ഥാനമായി പ്രവര്ത്തിക്കുന്ന സിസ്റ്റേഴ്സ് ഓഫ് ചാരിറ്റി എന്ന സംഘടനയുമായി ബന്ധപ്പെട്ട് പ്രവര്ത്തിച്ചു വരികയായിരുന്നു.
ഇറ്റലിയില് നിന്നാണ് കാബൂളിലെ ശാരീരിക വെല്ലുവിളികള് നേരിടുന്ന കുട്ടികളുടെ പരിശീലകയായി നിയോഗിക്കപ്പെട്ടത്. ഇവിടെ 30 പ്രാദേശിക വിദ്യാര്ത്ഥികളെ പരിശീലിപ്പിച്ചു വരുന്നതിനിടെയാണ് താലിബാന് അഫ്ഗാന് ഭരണം പിടിച്ചെടുത്തത്.
പി.ബി.കെ ഇറ്റാലിയാനാ എന്ന കമ്പിനിക്കു കീഴിലാണ് ഇവര് അഫ്ഗാനിലെത്തിയത്. കമ്പിനി അധികൃതര് ഇവരോട് തല്ക്കാലം കാബൂളില് തന്നെ തങ്ങാനാണ് നിര്ദ്ദേശിച്ചിട്ടുള്ളതെന്നാണ് വിവരം. ഇറ്റലി എംബസിയും ഇന്ത്യന് എംബസിയും ഇവരുമായി ബന്ധപ്പെട്ട് കാര്യങ്ങള് അന്വേഷിക്കുകയും ആവശ്യമായ സംരക്ഷണം ഏര്പ്പെടുത്തുകയും ചെയ്തതായി ബന്ധുക്കള് പറഞ്ഞു. കാബൂള് വിമാനത്താവളം തുറന്നാലുടന് ഇരുവരെയും ഇറ്റലിയിലെത്തിച്ച് നാട്ടിലേക്കയക്കുമെന്നാണ് ഇറ്റലിയിലെ കമ്പിനി അധികൃതര് ഇവര്ക്ക് ഉറപ്പു നല്കിയിട്ടുള്ളത്.
