ഇടുക്കി : ശാന്തന്പാറ കള്ളിപ്പാറയില് പൂത്ത നീലക്കുറിഞ്ഞി കാണാന് സന്ദര്ശകരുടെ എണ്ണം ദിനംപ്രതി കൂടി വരുന്നു. പന്ത്രണ്ട് വര്ഷത്തിലൊരിക്കല് പൂക്കുന്ന നീലക്കുറിഞ്ഞി കാണാനെത്തുന്നവര് പൂക്കള് പറിച്ച് ഫോട്ടോഷൂട്ട് നടത്തുന്നതിനെയും പ്ലാസ്റ്റിക് അടക്കമുള്ള മാലിന്യങ്ങള് പരിസരത്ത് വലിച്ചെറിയുന്നതും സോഷ്യല് മീഡിയയില് ഏറെ ചര്ച്ചാ വിഷയമാണ്.
നിരവധി പേര് സഞ്ചാരികളുടെ അടക്കം ഫേസ്ബുക്ക് ഗ്രൂപ്പുകളില് വിഷയം ചര്ച്ച ചെയ്തിരുന്നു. ഇതിനിടെ നടന് നീരജ് മാധവ് വിഷയത്തില് പ്രതികരണവുമായി രംഗത്തെത്തിയിരിക്കുകയാണ്. നീലക്കുറിഞ്ഞി സന്ദര്ശനം ഒരു ദുരന്തമായി മാറിയിരിക്കുകയാണെന്നും വലിയ അളവില് പ്ലാസ്റ്റിക് മാലിന്യങ്ങള് ആളുകള് പരിസരത്ത് വലിച്ചെറിയുന്നുണ്ടെന്നും നീരജ് മാധവ് ഫേസ്ബുക്കില് കുറിച്ചു. ചിത്രങ്ങള് സഹിതമാണ് നടന്റെ പോസ്റ്റ്.
