കോന്നി : പുനലൂര് മൂവാറ്റുപുഴ സംസ്ഥാന പാതയുടെ നിര്മ്മാണവുമായി ബന്ധപ്പെട്ട് കോന്നി സര്വ്വീസ് സഹകരണബാങ്കിന് മുന്നില് വാട്ടര് അതോറിറ്റി പൈപ്പ് ലൈന് പൊട്ടിയത് മൂലം സെന്ട്രല് ജംഗ്ഷനില് രൂപപ്പെട്ട കുഴി അപകടക്കെണിയാകുന്നു. ഓട നിര്മ്മാണത്തിന്റെ ഭാഗമായി മണ്ണ് മാറ്റിയതിനെ തുടര്ന്നാണ് ഇവിടെ പൈപ്പ് ലൈന് പൊട്ടിയത്. എന്നാല് പൊട്ടിയ പൈപ്പ് ലൈന് പുനഃസ്ഥാപിക്കാത്തത് മൂലം ഇവിടെ നിന്ന് ഒഴുകി ഇറങ്ങിയ വെള്ളം കോന്നി സെന്ട്രല് ജംഗ്ഷനില് കെട്ടി കിടന്ന് റോഡില് വലിയ കുഴി രൂപപ്പെടുകയും ചെയ്തു.
നൂറ് കണക്കിന് വാഹനങ്ങള് കടന്നുപോകുന്ന ഈ റോഡില് നിരവധി ഇരുചക്ര വാഹനങ്ങളാണ് റോഡിലെ കുഴിയില് വീണ് അപകടം സംഭവിക്കുന്നത്. മാത്രമല്ല വാട്ടര് അതോറിറ്റി ഓഫീസിന് മീറ്ററുകള് മാത്രം അകലെയുള്ള ഈ കുഴി അധികൃതര് നികത്താത്തതില് കടുത്ത പ്രതിഷേധത്തിലാണ് നാട്ടുകാര്. നഗരമധ്യത്തില് പൊട്ടിയ പൈപ്പ് ലൈന് പുനഃസ്ഥാപിച്ച് കുഴി നികത്താന് അധികൃതര് തയ്യാറായില്ലെങ്കില് വലിയ അപകടങ്ങളാവും ഇവിടെ ജനങ്ങളെ കാത്തിരിക്കുക.
