ജറുസലേം : തുർക്കിക്ക് അമേരിക്കയുടെ അത്യാധുനിക എഫ്-35 സ്റ്റെൽത്ത് യുദ്ധവിമാനങ്ങൾ വിൽക്കാനുള്ള പ്രസിഡന്റ് ഡൊണാൾഡ് ട്രംപിന്റെ നീക്കത്തിനെതിരെ ശക്തമായ ആശങ്ക പ്രകടിപ്പിച്ച് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു. തുർക്കിക്ക് ഇത്തരത്തിലുള്ള സൈനിക ശേഷി നൽകുന്നത് മേഖലയിലെ സുരക്ഷയ്ക്ക് ഭീഷണിയാകുമെന്ന് അദ്ദേഹം മുന്നറിയിപ്പ് നൽകി. എഫ്-35 വിമാനങ്ങൾ കൈമാറുന്നതിലൂടെ തുർക്കി അമേരിക്കയുടെ കൂടുതൽ വിശ്വസ്ത സഖ്യകക്ഷിയാകുമെന്ന വിലയിരുത്തൽ ശരിയല്ലെന്ന് അദ്ദേഹം പറഞ്ഞു. തുർക്കി പ്രസിഡന്റ് റജബ് ത്വയ്യിബ് ഉർദുഗാന്റെ ഭരണകൂടം മുസ്ലിം ബ്രദർഹുഡ് ആശയങ്ങളിൽ നിന്ന് സ്വാധീനിക്കപ്പെട്ടതാണെന്നും, അമേരിക്കയോടും ഇസ്രയേലോടും ശത്രുതാപരമായ സമീപനമാണ് സ്വീകരിക്കുന്നതെന്നും അദ്ദേഹം ആരോപിച്ചു.
ഇസ്രയേലിനെ നശിപ്പിക്കുമെന്ന് പരസ്യമായി ഭീഷണിപ്പെടുത്തുന്ന നേതൃത്വത്തിന് അത്യാധുനിക യുദ്ധവിമാനങ്ങൾ കൈമാറുന്നത് ഗുരുതര പ്രത്യാഘാതങ്ങൾക്ക് ഇടയാക്കുമെന്നും നെതന്യാഹു ചൂണ്ടിക്കാട്ടി. തുർക്കിയെ സമാധാനത്തിനായി പ്രവർത്തിക്കുന്ന രാജ്യമെന്ന നിലയിൽ കാണാനാകില്ലെന്നും അദ്ദേഹം വിമർശിച്ചു.
