പാരീസ്: ഫ്രാന്സില് ആദ്യമായി ബ്രിട്ടനില് ജനിതകമാറ്റം സംഭവിച്ച കൊറോണ വൈറസ് സ്ഥിരീകരിച്ചതായി ആരോഗ്യമന്ത്രാലയം. അതിവ്യാപന ശേഷിയുള്ള വൈറസായതിനാല് രാജ്യത്ത് കടുത്ത നിരീക്ഷണം ഏര്െപ്പടുത്തി. 50ഓളം രാജ്യങ്ങള് നിലവില് യു.കെയിലേക്ക് യാത്രാവിലക്ക് ഏര്പ്പെടുത്തിയിരുന്നു.
ഡിസംബര് 19ന് ബ്രിട്ടനില് നിന്ന് ലണ്ടനിലേക്ക് തിരിച്ചെത്തിയ പൗരനാണ് രോഗം സ്ഥിരീകരിച്ചത്. ഡിസംബര് 21ന് പരിശോധനക്ക് വിധേയമാക്കിയ അദ്ദേഹത്തിന് കോവിഡ് സ്ഥിരീകരിക്കുകയായിരുന്നു. തിങ്കളാഴ്ച ഫ്രാന്സ് ആരോഗ്യമന്ത്രി ഒലിവിയര് വെരന് രാജ്യത്ത് കൊറോണ വൈറസിന്റെ വകഭേദം കണ്ടെത്തിയതായി സ്ഥിരീകരിച്ചിരുന്നു. അദ്ദേഹത്തിന് രോഗലക്ഷണങ്ങളില്ല. നിലവില് വീട്ടില് സ്വയം നിരീക്ഷണത്തിലാണ് അദ്ദേഹം.
രോഗം സ്ഥിരീകരിച്ച വ്യക്തിയുമായി സമ്പര്ക്കത്തില് വന്നവരെ കണ്ടെത്താനുള്ള ശ്രമത്തിലാണ് ആരോഗ്യ വിദഗ്ധര്. സമ്പര്ക്കത്തില് വന്നവരെ നിരീക്ഷണത്തിലാക്കാനാണ് നീക്കം.
റോമില് ഒരാള്ക്ക് പുതിയ കൊറോണ വൈറസ് രോഗം സ്ഥിരീകരിച്ചതായി ഇറ്റാലിയന് അധികൃതര് അറിയിച്ചു. ഡെന്മാര്ക്ക്, നെതര്ലന്ഡ്സ്, ആസ്ട്രേലിയ എന്നീ രാജ്യങ്ങളിലായി ഒന്പതോളം പേര്ക്ക് ജനിതകമാറ്റം സംഭവിച്ച കൊറോണ വൈറസ് രോഗം സ്ഥിരീകരിച്ചതായി ലോകാരോഗ്യ സംഘടന വ്യക്തമാക്കി.
യൂറോപ്യന് രാജ്യങ്ങളില് ജനിതക മാറ്റം സംഭവിച്ച കൊറോണ വൈറസ് പടരുന്നത് ആശങ്ക ഉയര്ത്തുന്നുണ്ട്. യൂറോപ്പില് ഏറ്റവും കൂടുതല് നാശം വിതക്കുന്നത് യു.കെയിലാണ്. ഇവിടെ ഇതുവരെ 68,000 മരണം റിപ്പോര്ട്ട് ചെയ്തു.
