വാഹന രജിസ്ട്രേഷനുമായി ബന്ധപ്പെട്ട നടപടികള്ക്കായി വാഹന ഉടമകള് ഓണ്ലൈന് സംവിധാനമായ പരിവാഹന് വെബ് സൈറ്റില് മൊബൈല് നമ്പര് നല്കണമെന്ന് മോട്ടോര് വാഹനവകുപ്പ്. മോട്ടോര് വാഹന ഇടപാടുകള് പൂര്ണ്ണമായും ഓണ്ലൈനിലേക്ക് മാറ്റുന്നതിനായാണ് സര്ക്കാര് നടപടിക്രമങ്ങള് വേഗത്തിലാക്കുന്നത്.
“വാഹന രജിസ്ട്രേഷന് സംബന്ധിച്ച മേല് വിലാസം മാറ്റം, വാഹന കൈമാറ്റം രേഖപ്പെടുത്തല് തുടങ്ങിയ സേവനങ്ങള് പൂര്ണമായും ഓണ്ലൈന് ആക്കുന്നതിനായി വാഹനയുടമയുടെ യഥാര്ത്ഥ മൊബൈല് നമ്പര് വാഹന് സോഫ്റ്റ് വെയറില് ചേര്ക്കണം. എല്ലാ വാഹനയുടമകളും നിര്ബന്ധമായും ഉടമയുടെ മൊബൈല് നമ്പര് പരിവര്ത്തന് വെബ്സൈറ്റില് (www. parivahan.gov.in) നല്കണം. ആദ്യ ഘട്ടത്തിൽ ഡ്രൈവിങ് ലൈസന്സ് സംബന്ധമായ എല്ലാ സേവനങ്ങളും പൂര്ണമായും ഓണ്ലൈൻ ആയിക്കഴിഞ്ഞു. അടുത്തത് വാഹന ഇടപാടുകള് സംബന്ധിച്ച നടപടികളാണ് ഓണ്ലൈനില് ആക്കുന്നത്.