ദില്ലി: കേന്ദ്രസര്ക്കാരിനെ കുറിച്ച് സാമൂഹ്യ മാധ്യമങ്ങളില് വ്യാജ വാര്ത്ത പ്രചരിക്കുന്നത് തടയാന് പുതിയ സംവിധാനം വരുമെന്ന് ഐടി മന്ത്രാലയം. സര്ക്കാരിനെ കുറിച്ചുള്ള വാര്ത്തകളുടെ നിജസ്ഥിതി ഈ സംവിധാനം പരിശോധിക്കും. വ്യാജമെന്ന് കണ്ടെത്തുന്ന വാര്ത്തകള് നീക്കം ചെയ്യാന് സര്ക്കാരിന് അധികാരം നല്കുന്നതാകും പുതിയ ചട്ടം. വാര്ത്തകള് നീക്കാത്തവര്ക്കെതിരെ നിയമ നടപടി സ്വീകരിക്കാനും ഇതിലൂടെ കേന്ദ്ര സര്ക്കാരിനാകും. വ്യാജ പ്രചാരണം ഒഴിവാക്കാനാണ് നടപടിയെന്നും ഇത് അഭിപ്രായ സ്വാതന്ത്ര്യത്തിലുള്ള കടന്നു കയറ്റമല്ലെന്നും ഐടി മന്ത്രി രാജീവ് ചന്ദ്രശേഖര് വ്യക്തമാക്കി.
അതേസമയം ഓണ്ലൈന് ഗെയിമിംഗ് മേഖലയെ നിയന്ത്രിക്കുന്നതിനുള്ള അന്തിമ വിജ്ഞാപനം കേന്ദ്രം പുറത്തിറക്കി. വാതുവെപ്പ്, ചൂതാട്ടം എന്നിവ നടത്തുന്ന ഓണ്ലൈന് ഗെയിമുകള് പൂര്ണമായും നിരോധിക്കും. 2021-ലെ ഐ ടി ഇന്റര്മീഡിയറി ചട്ടങ്ങളാണ് ഭേദഗതി ചെയ്യുന്നത്. ജനുവരിയില് കരടുനയം പുറത്തിറക്കിയിരുന്നു. പതിനെട്ട് വയസ്സില് താഴെയുള്ള കുട്ടികള്ക്ക് ഗെയിം കളിക്കുന്നതിന് രക്ഷിതാക്കളുടെ അനുമതി വേണമെന്ന വ്യവസ്ഥയും ചട്ടത്തിലുണ്ട്.
