കോഴിക്കോട്: സ്വര്ണക്കടത്ത് കേസുമായി ബന്ധപ്പെട്ട് ദേശീയ അന്വേഷണ ഏജന്സി സംഘം സെക്രട്ടേറിയറ്റിലെത്തിയത് മലയാളികള്ക്ക് നാണക്കേടാണെന്നും മുഖ്യമന്ത്രി ഉടന് രാജിവെക്കണമെന്നും ബി.ജെ.പി സംസ്ഥാന അദ്ധ്യക്ഷന് കെ.സുരേന്ദ്രന്. രാജ്യദ്രോഹക്കേസ് അന്വേഷിക്കാന് എന്.ഐ.എ സംഘം സെക്രട്ടേറിയറ്റിന് അകത്തെത്തിയത് രാജ്യത്തെ തന്നെ ഞെട്ടിച്ചിരിക്കുകയാണെന്ന് അദ്ദേഹം പ്രസ്താവനയില് പറഞ്ഞു.
മുഖ്യമന്ത്രിയുടെ ഓഫീസില് എന്.ഐ.എ കയറും മുമ്പ് രാജിവെച്ച് ഇറങ്ങി പോവാന് അദ്ദേഹം തയ്യാറാവണം. ഇനിയും ഭരണത്തില് കടിച്ചുത്തൂങ്ങുന്നത് കേരളത്തെ അപമാനിക്കുന്നതിന് തുല്ല്യമാണെന്ന് പിണറായി വിജയന് മനസിലാക്കണം. സി.സി.ടി.വി ദൃശ്യങ്ങള് ദേശീയ അന്വേഷണ ഏജന്സി ആവശ്യപ്പെട്ടിട്ടും സംസ്ഥാന സര്ക്കാര് വിട്ടുകൊടുക്കാതിരുന്നത് അന്വേഷണം മുഖ്യമന്ത്രിയിലേക്ക് എത്തുമെന്ന് ഉറപ്പായതിനാലാണ്. പ്രോട്ടോക്കോള് ഓഫീസിലെ ഫയല് തീവെച്ച് നശിപ്പിച്ചത് എന്തിനായിരുന്നെന്ന് ഇപ്പോള് എല്ലാവര്ക്കും ബോധ്യമായി. ഇതും എന്.ഐ.എ പരിശോധിക്കുമെന്നാണ് കരുതുന്നത്. കേന്ദ്ര ഏജന്സികളുടെ അന്വേഷണത്തിന് എല്ലാസഹായവും ചെയ്യുമെന്ന് പറഞ്ഞ സര്ക്കാര് തെളിവുകള് നശിപ്പിക്കാനാണ് ശ്രമിച്ചതെന്നും സുരേന്ദ്രന് പറഞ്ഞു.
