ഫരീദാബാദ്: നികിത തോമര് കൊലക്കേസില് പ്രതി തൗസീഫിനെതിരെ എഴുന്നൂറ് പേജ് കുറ്റപത്രം തയ്യാറാക്കി പ്രത്യേക അന്വേഷണം സംഘം. കുറ്റപത്രത്തില് 60 സാക്ഷികളുടെ വിവരങ്ങള് ഉള്പ്പെടുത്തിയിട്ടുണ്ട്. കുറ്റപത്രം ഫരീദാബാദ് കോടതിയില് സമര്പ്പിച്ചു.
കൊലപാതകം, കൊലപ്പെടുത്താന് ഉദ്ദേശിച്ച് തട്ടിക്കൊണ്ട് പോകല്, ആയുധ നിയമത്തിലെ കാതലായ വകുപ്പുകള് എന്നിവ പ്രതികള്ക്കെതിരെ ചുമത്തിയിട്ടുണ്ട്. മുഖ്യപ്രതിയായ തൗസീഫ്, സഹായി റെഹാന്, ആയുധം നല്കിയ ആജ്രു എന്നിവര് നിലവില് പോലീസ് കസ്റ്റഡിയിലാണ്.
കഴിഞ്ഞ ഒക്ടോബര് 26നാണ് നികിത തോമര് എന്ന 21 വയസ്സുകാരിയായ ബികോം വിദ്യാര്ത്ഥിനി കൊല്ലപ്പെടുന്നത്. തട്ടിക്കൊണ്ട് പോയി മതം മാറ്റാനുള്ള ശ്രമം ചെറുക്കുന്നതിനിടെ പ്രതിയായ തൗസീഫ് പെണ്കുട്ടിക്ക് നേരെ നിറയൊഴിക്കുകയായിരുന്നു. സംഭവം മുഴുവന് പരിസരത്തെ സിസിടിവിയില് പതിഞ്ഞിരുന്നു. ഇതിന്റെ അടിസ്ഥാനത്തില് പ്രതികള് പിടിയിലാകുകയായിരുന്നു.
പെണ്കുട്ടിയുടെ കുടുംബത്തിന് രാഷ്ട്രീയ സ്വാധീനമുള്ള തൗസീഫിന്റെ ബന്ധുക്കളില് നിന്നും ഭീഷണി ഉണ്ടായിരുന്നു. തുടര്ന്ന് ഇവര്ക്ക് സുരക്ഷ ശക്തമാക്കിയിട്ടുണ്ട്. പെണ്കുട്ടിയുടെ സഹോദരനും അടുത്ത ബന്ധുക്കള്ക്കും തോക്ക് ഉപയോഗിക്കനുള്ള ലൈസന്സ് നല്കിയതായി ഹരിയാന പോലീസ് അറിയിച്ചു.
