വടശ്ശേരിക്കര : പെരുനാട്ടിൽ സ്വകാര്യ ബസിന്റെ ഫുഡ് ബോർഡിൽ നിന്നും കാൽവഴുതി വീണ് വയോധികൻ മരിച്ചു. മേലേടത്തു മേലേതിൽ വീട്ടിൽ എം.പി കമലാസനൻ [75] ആണ് മരിച്ചത്. ഇന്നലെ രാവിലെ 9 .30 നാണ് അപകടം ഉണ്ടായത്. തുടർന്ന് നാട്ടുകാരും ബന്ധുക്കളും ചേർന്ന് പത്തനംതിട്ട ജനറൽ ആശുപത്രിയിൽ എത്തിച്ചു എങ്കിലും ജീവൻ രക്ഷിക്കാൻ കഴിഞ്ഞില്ല. പെരുനാട് ചന്തയിൽ നിന്നും മഠത്തുംപടിയിലേക്ക് പോയ ഗ്രേസ് എന്ന പേരിലുള്ള ബസിൽ നിന്നും പെരുനാട് അമ്പലത്തിനു സമീപത്തുവെച്ചായിരുന്നു അപകടം നടന്നത്.
കൊച്ചുമകളെ സ്കൂളിൽ വിടുന്നതിന് വേണ്ടി കുട്ടിയെ ബസിൽ കയറ്റിയ ശേഷം തിരിച്ചു ഇറങ്ങുമ്പോൾ ബസ്സ് മുൻപോട്ട് എടുത്തതാണ് അപകട കാരണമായി പറയുന്നത്. അലക്ഷ്യമായി വാഹനമോടിച്ചതിന് ബസ് ഡ്രൈവർക്കെതിരെ പോലീസ് കേസ് രജിസ്റ്റർ ചെയ്തു. മൃതദേഹം പത്തനംതിട്ട ജനറൽ ഹോസ്പിറ്റൽ മോർച്ചറിയിൽ സൂക്ഷിച്ചിരിക്കുന്നു. ഭാര്യ ശ്യാമള. മക്കൾ ഷീബാ, വിനോദ്. സംസ്കാരം പിന്നീട് .
