പത്തനംതിട്ട : പത്തനംതിട്ട നഗരത്തിനോട് ചേര്ന്നുകിടക്കുന്ന ഓമല്ലൂരില് പുള്ളിമാന് ഇറങ്ങിയത് ഏവര്ക്കും കൌതുകമാകുന്നു. കഴിഞ്ഞ ഏതാനും ദിവസങ്ങളായി ഓമല്ലൂർ പഞ്ചായത്തിലെ ആറ്റരികം വാർഡിലാണ് ഒരു പുള്ളിമാൻ പ്രത്യക്ഷപ്പെട്ടിട്ടുള്ളത്. പുള്ളിമാനെ സുരക്ഷിതമായി പിടികൂടി കാട്ടിലേക്ക് വിടുവാനുള്ള നടപടി വനം വകുപ്പ് ആരംഭിച്ചു. ഇത് സംബന്ധിച്ച് പൊതുജനങ്ങള്ക്ക് മുന്നറിയിപ്പ് നോട്ടീസും അധികൃതര് നല്കിയിട്ടുണ്ട്.
പുള്ളിമാൻ 1972 ലെ വന്യജീവിസംരക്ഷണ നിയമപ്രകാരം വന്യ ജീവികളുടെ ഗണത്തിൽ ഉൾപ്പെടുന്നതും ആയതിനെ ഉപദ്രവിക്കുന്നതും വേട്ടയാടുന്നതും വന്യജീവി സംരക്ഷണ നിയമം 9, 51 എന്നീ വകുപ്പുകൾ പ്രകാരം കുറ്റകരവും ശിക്ഷാർഹവുമാണെന്ന് വനംവകുപ്പും ഓമല്ലൂര് പഞ്ചായത്ത് അധികൃതരും അറിയിച്ചിട്ടുണ്ട്. പുള്ളിമാനെ കാണുന്നവര് വാർഡ് മെമ്പറെയോ ഉത്തരവാദിത്വപ്പെട്ട അധികാരികളെയോ അറിയിക്കണമെന്നും ഇതിനെ ഉപദ്രവിക്കുന്നതും ശല്യം ചെയ്യുന്നതും നിയമ പ്രശ്നങ്ങൾക്ക് ഇടയാക്കുമെന്നതിനാല് ജനങ്ങള് ജാഗ്രത പാലിക്കണമെന്നും ഓമല്ലൂർ ഗ്രാമപഞ്ചായത്ത് പ്രസിഡന്റ് അഡ്വ.ജോൺസൻ വിളവിനാൽ അറിയിച്ചു.
