കോന്നി : കോന്നി ആനത്താവളത്തിൽ ഒമാൻ ദമ്പതികളുടെ ഓണാഘോഷം ശ്രദ്ധേയയമായി. കഴിഞ്ഞ മാസം 25 നാണ് ഒമാൻ ദമ്പതികൾ ആയ മുഹമ്മദും ഭാര്യ ഗീതും കേരളത്തിൽ എത്തിയത്. പ്രധാന വിനോദ സഞ്ചാര കേന്ദ്രങ്ങളായ തേക്കടി, കൊടയ്ക്കനാൽ, വാഗമൺ തുടങ്ങി നിരവധി സ്ഥലങ്ങൾ സഞ്ചരിച്ച ദമ്പതികൾ ആനത്താവളം സന്ദർശിക്കുന്നതിന്റെ ഭാഗമായാണ് കോന്നി ഇക്കോ ടൂറിസം സെന്ററിൽ എത്തുന്നത്.
ഈ സമയം മ്യൂസിയതിയനുമുന്നിൽ അത്തപൂക്കളം ഇടുന്ന ജീവനക്കാരെ കണ്ട് കൗതുകം തോന്നിയ ദമ്പതികൾ ”ഞങ്ങളെ കൂടെ പൂക്കളം ഇടാൻ കൂട്ടാമോ” എന്ന് ചോദിച്ച് ജീവനക്കാർക്കൊപ്പം കൂടുകയായിരുന്നു. തുടർന്ന് കൂടെ ഉണ്ടായിരുന്ന ആളുടെ സഹായത്താൽ ഓണത്തിന്റെ ഐതീഹ്യവും ജീവനക്കാരിൽ നിന്നും മനസിലാക്കിയാണ് ഇവർ മടങ്ങിയത്.
