തിരുവനന്തപുരം: രാജ്യത്തിന്റെ നിയമത്തിനും കോടതി വിധികള്ക്കും വിധേയമായി ഏത് സമാധാന ശ്രമത്തെയും ഓര്ത്തഡോക്സ് സഭ സ്വാഗതം ചെയ്യുന്നതായി അസോസിയേഷന് സെക്രട്ടറി അഡ്വ. ബിജു ഉമ്മന്. മുഖ്യമന്ത്രി വിളിച്ചുചേര്ത്ത യോഗത്തില് മലങ്കര സഭയില് നിയമാനുസൃതമായ ശാശ്വത സമാധാനം സ്ഥാപിക്കുന്നതിന് മുഖ്യമന്ത്രി നടത്തുന്ന എല്ലാ പരിശ്രമങ്ങള്ക്കും ഓര്ത്തഡോക്സ് സഭയുടെ പൂര്ണ്ണ പിന്തുണ വാഗ്ദാനം ചെയ്യുന്നതായി അദ്ദേഹം പറഞ്ഞു. പ്രശ്ന പരിഹാരം വൈകിക്കാതെ, ഇരു കൂട്ടരുമായി വെവ്വേറെ ചര്ച്ച നടത്തി സമയബന്ധിതമായി നടപടി സ്വീകരിക്കാമെന്ന മുഖ്യമന്ത്രിയുടെ നിലപാട് ആശാവാഹമാണ്.
സഭാ തര്ക്കം പരിഹരിക്കുന്നതിന് നിയമ നിര്മ്മാണം നടത്തുന്നത് സംബന്ധിച്ച് സര്ക്കാര് യാതൊരു തീരുമാനവും കൈകൊണ്ടിട്ടില്ലെന്ന് മുഖ്യമന്ത്രി പറഞ്ഞതായും അദ്ദേഹം പറഞ്ഞു. ഓര്ത്തഡോക്സ് സഭയെ പ്രതിനിധീകരിച്ച് വൈദിക ട്രസ്റ്റി ഫാ. ഡോ. തോമസ് വര്ഗീസ് അമയില്, അത്മായ ട്രസ്റ്റി റോണി വര്ഗീസ്, അസോസിയേഷന് സെക്രട്ടറി അഡ്വ. ബിജു ഉമ്മന്, സഭാ വക്താവ് ഫാ. ഡോ. ജോണ്സ് എബ്രഹാം കോനാട്ട് എന്നിവര് പങ്കെടുത്തു.
