പാലക്കാട്: കടത്തികൊണ്ടുപോകൻ ശ്രമിച്ച കഞ്ചാവുമായി രണ്ടു പേർ പിടിയിൽ. ഒലവക്കോട് റെയിൽവേ സ്റ്റേഷനിലാണ് സംഭവം. തൊടുപുഴ സ്വദേശി മുഹമ്മദ് യാസിർ, ആലപ്പുഴ സ്വദേശി അബ്ദുൾ റാസിക്ക് എന്നിവരാണ് 48 കിലോ കഞ്ചാവുമായി അറസ്റ്റിലായത്. ആർപിഎഫും എക്സൈസും നടത്തിയ സംയുക്ത പരിശോധനയിൽ ആണ് കഞ്ചാവ് പിടിച്ചെടുത്തത്. പ്ലാറ്റ്ഫോമിൽ പരിശോധന നടക്കുന്നത് കണ്ട് ഇവർ ഓടി രക്ഷപെടാൻ ശ്രമിച്ചു. തുടർന്ന്, സംശയം തോന്നിയതോടെയാണ് ഉദ്യോഗസ്ഥർ ഇവരുടെ ബാഗുകൾ പരിശോധിച്ചത്.
രണ്ട് ബാഗുകളിലായി സൂക്ഷിച്ചിരുന്ന 48 കിലോ കഞ്ചാവാണ് കണ്ടെത്തിയത്. ഒറീസയിൽ നിന്നാണ് ഇവർ കഞ്ചാവ് കൊണ്ടുവന്നിരുന്നത്. എറണാകുളത്തേക്ക് ട്രെയിൻ മാർഗം കൊണ്ടു പോവുകയായിരുന്നു ഇവരുടെ ലക്ഷ്യമെന്നും ആർപിഎഫ് വ്യക്തമാക്കി.
