പരിയാരം : കണ്ണൂർ ഗവ.മെഡിക്കൽ കോളജ് ആശുപത്രി ക്യാംപസിൽ നാളെ മുതൽ വാഹനങ്ങൾക്ക് പാർക്കിങ് ഫീസ് നൽകണം. സർക്കാർ – പൊതുമേഖലാ സ്ഥാപനങ്ങളുടെ വാഹനങ്ങൾ, ഔദ്യോഗിക മാധ്യമങ്ങളുടെ വാഹനങ്ങൾ, പരിയാരം ഗവ.മെഡിക്കൽ കോളജിന് കീഴിൽ വരുന്ന സ്ഥാപനങ്ങളിലെ ജീവനക്കാരുടെയും വിദ്യാർഥികളുടെയും വാഹനങ്ങൾ എന്നിവ ഒഴികെ എല്ലാ വാഹനങ്ങൾക്കും ഫീസ് ബാധകമായിരിക്കും.
4 ചക്രവാഹനങ്ങൾക്ക് 20 രൂപയും മുച്ചക്ര വാഹനങ്ങൾക്ക് 10 രൂപയും ഇരു ചക്രവാഹനങ്ങൾക്ക് 5 രൂപയുമാണ് ഫീസ്. നാലു മണിക്കൂർ നേരത്തേക്ക് കണക്കാക്കിയാണ് ഈ ഫീസ് നിശ്ചയിച്ചിരിക്കുന്നത്. പാർക്കിങ് ഫീസ് ഇളവു ചെയ്ത മേൽ സൂചിപ്പിച്ച വാഹനങ്ങളിൽ തെളിവിനായി ഔദ്യോഗിക മുദ്ര പതിക്കണം. കണ്ണൂർ കുടുംബശ്രീ മിഷനുമായി ചേർന്നാണ് മെഡിക്കൽ കോളജിലെ പാർക്കിങ് ഫീസ് സംവിധാനം നടപ്പാക്കുന്നത്. ഈ വരുമാനം ആശുപത്രി വികസനത്തിനായി പ്രയോജനപ്പെടുത്തുമെന്ന് അധികൃതർ പറഞ്ഞു.
