ഡല്ഹി: സോണിയ ഗാന്ധിക്കെതിരായ ഇ ഡി നടപടിയിലും എം പിമാരെ സസ്പെന്ഡ് ചെയ്ത വിഷയത്തിലും പാര്ലമെന്റില് പ്രതിഷേധം ശക്തമാക്കി പ്രതിപക്ഷം. ലോകസഭയിലും രാജ്യസഭയിലും അടിയന്തിര പ്രമേയ നോട്ടീസുകള് അനുവദിക്കാത്ത പശ്ചാത്തലത്തിലായിരുന്നു പ്രതിഷേധം. പാര്ലമെന്റിന് പുറത്ത് സസ്പെന്ഷന് ഓര്ഡര് കീറിയെറിഞ്ഞായിരുന്നു കോണ്ഗ്രസ് അംഗങ്ങളുടെ പ്രതിഷേധം. സര്ക്കാര് സമീപനങ്ങളോട് മ്യദുസമീപനം ഇല്ലെന്ന് വ്യക്തമാക്കിയാണ് കോണ്ഗ്രസ് അംഗങ്ങള് പാര്ലമെന്റിന്റെ ഇരുസഭകളിലും എത്തിയത്. സഭ നിര്ത്തിവെച്ച് നെഹ്റു കുടുംബത്തിനെതിരായ ഇ ഡി നടപടിയും എംപിമാരുടെ സസ്പെന്ഷന് വിഷയവും ചര്ച്ച ചെയ്യണമെന്ന് കോണ്ഗ്രസ് അംഗങ്ങള് ആവശ്യപ്പെട്ടു.
