പത്തനംതിട്ട : സന്ധ്യ കഴിഞ്ഞാല് പത്തനംതിട്ട നഗരത്തിലെ പല ഭാഗങ്ങളിലും വെളിച്ചമില്ലാതെ വന്നതോടെ നഗരത്തില് സാമൂഹ്യ വിരുദ്ധശല്യം വര്ധിക്കുന്നു. മിനി സിവില് സ്റ്റേഷന്റെ പിന്നിലെ റോഡ്, ചന്ത ഭാഗം, മുത്താരമ്മന് കോവില് റോഡ്, കല്ലറക്കടവ് റോഡ് എന്നിവിടങ്ങളില് ആണ് പ്രധാനമായും വെളിച്ചമില്ലാത്തത്. ചിലയിടങ്ങളില് സ്ട്രീറ്റ് ലൈറ്റുകള് ഉണ്ടെങ്കിലും ഇതില് പകുതിയും കത്തുന്നില്ല. ചിലയിടത്ത് ലൈറ്റുകള് പോലുമില്ല. നഗരത്തിലെ പല ഇലക്ട്രിക് പോസ്റ്റുകളിലും ഇനിയും ലൈറ്റുകള് സ്ഥാപിക്കുവാനുണ്ട്. നഗരത്തില് ഇരുട്ട് വര്ദ്ധിച്ചതോടെ സാമൂഹ്യ വിരുദ്ധ ശല്യവും വര്ധിച്ചിട്ടുണ്ട്.
ചന്തയുടെ ഭാഗത്തുള്പ്പെടെ മദ്യപന്മാരടക്കം വിലസുകയാണ്. ഇരുട്ട് നിറഞ്ഞ വഴികളില് കൂടിയാണ് സ്ത്രീകള് ഉള്പ്പെടെയുള്ളവര് സഞ്ചരിക്കേണ്ടത്. എന്നിട്ടും നഗരത്തില് വെളിച്ചമെത്തിക്കാന് ആവശ്യമായ യാതൊരു നടപടിയും പത്തനംതിട്ട നഗരസഭ സ്വീകരിച്ചിട്ടില്ല. തെരുവ്നായ ശല്യമാണ് മറ്റൊരു പ്രശ്നം. നഗരത്തില് പലയിടത്തും തെരുവ് നായകള് ഇരുട്ടില് കൂട്ടമായി നടക്കുന്നതും കാണാം. വ്യാപാര സ്ഥാപനങ്ങളുടെ വെളിച്ചമാണ് ഇപ്പോള് പൊതു ജനങ്ങള്ക്ക് ആശ്വാസമാകുന്നത്. നഗരത്തില് വെളിച്ചമില്ലാത്ത ഇടങ്ങളില് വെളിച്ചമെത്തിക്കാന് പല പദ്ധതികളും ആസൂത്രണം ചെയ്ത് നടപ്പാക്കുന്ന കാലഘട്ടത്തിലാണ് പത്തനംതിട്ട നഗര ഹൃദയത്തില് വെളിച്ചമില്ലാതെ ജനം ബുദ്ധിമുട്ടുന്നത്.
