പത്തനംതിട്ട : സമത്വത്തിനും സാമൂഹിക നീതിക്കും വേണ്ടിയുള്ള വിട്ടുവീഴ്ചയില്ലാത്ത പോരാട്ടത്തിന്റെ ഓർമ്മപ്പെടുത്തലാണ് ഡോ.ബി.ആർ.അംബേദ്കറെന്ന് ഡി.സി.സി പ്രസിഡന്റ് പ്രൊഫ.സതീഷ് കൊച്ചുപറമ്പിൽ പറഞ്ഞു. ജില്ലാ കോൺഗ്രസ് കമ്മിറ്റിയുടെ ആഭിമുഖ്യത്തിൽ ഡോ.ബി. ആർ. അംബേദ്കറുടെ 135-ാം ജന്മദിനാഘോഷം ഉത്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം. ഭാരതീയ ഭരണഘടനയുടെ മുഖ്യ ശില്പിയും ആധുനിക ഇന്ത്യയുടെ ദാർശനികനുമായിരുന്നു ഡോ.അംബേദ്കര്. അതിജീവനത്തിന്റെ വിശ്വമാതൃകയായിരുന്നു അദ്ദേഹം. അയിത്തവും കടുത്ത അടിച്ചമർത്തലുകളും നേരിട്ട ഒരു പശ്ചാത്തലത്തിൽ നിന്നും വളർന്ന് ലോകത്തിലെ ഏറ്റവും മികച്ച സർവ്വകലാശാലകളിൽ നിന്ന് അറിവ് നേടി വിശ്വപൗരനായി മാറിയ അദ്ദേഹത്തിന്റെ ജീവിതം ഏവർക്കും പ്രചോദനമാണ്.
“വിദ്യ കൊണ്ട് പ്രബുദ്ധരാവുക” എന്ന മുദ്രാവാക്യം ഉയർത്തിപ്പിടിച്ച അംബേദ്കർ അറിവാണ് അടിമത്തത്തിൽ നിന്നുള്ള മോചനമെന്ന് ലോകത്തിന് കാണിച്ചുകൊടുത്തു. “ഒരു ജനതയുടെ പുരോഗതി അളക്കുന്നത് ആ നാട്ടിലെ സ്ത്രീകളുടെ പുരോഗതി നോക്കിയാണ്” എന്ന് വിശ്വസിച്ചിരുന്ന മഹാനായിരുന്നു ബാബാ സാഹേബെന്നും പ്രൊഫ.സതീഷ് കൊച്ചുപറമ്പിൽ പറഞ്ഞു. ഡിസിസി വൈസ് പ്രസിഡന്റ് അഡ്വ. അനിൽ തോമസ്സിന്റെ അധ്യക്ഷതയിൽ ചേർന്ന യോഗത്തിൽ മുൻ എം.എൽ.എ മാലേത്ത് സരളാദേവി, യൂത്ത് കോൺഗ്രസ് അഖിലേന്ത്യാ ജനറൽ സെക്രട്ടറി അഡ്വ.അബിൻ വർക്കി കോടിയാട്ട്, യു.ഡി.എഫ് ജില്ലാ കൺവീനർ എ.ഷംസുദ്ദീൻ, ഡിസിസി വൈസ് പ്രസിഡന്റുമാരായ അഡ്വ. വെട്ടൂർ ജ്യോതി പ്രസാദ്, അഡ്വ.എ.സുരേഷ് കുമാർ, ജനറൽ സെക്രട്ടറിമാരായ കെ.ജി.അനിത, ജോൺസൺ വിളവിനാൽ, ജെറി മാത്യു സാം, ബ്ലോക്ക് കോൺഗ്രസ് പ്രസിഡന്റ് റോജി പോൾ ദാനിയേൽ, ഡിസിസി നിർവാഹക സമിതി അംഗങ്ങളായ പി.കെ.ഇക്ബാൽ, അജിത് മണ്ണിൽ എന്നിവർ പ്രസംഗിച്ചു.
