പത്തനംതിട്ട : സ്ഥല പരിമിതിയില് വീര്പ്പുമുട്ടി കഴിയുകയാണ് പത്തനംതിട്ട കുടുംബശ്രീ ജില്ലാ മിഷന് ഓഫീസിലെ ജീവനക്കാര്. ജില്ലയുടെ വിവിധ ഭാഗങ്ങളില് നിന്നും എത്തുന്ന നൂറുകണക്കിന് ഫയലുകള് സൂക്ഷിക്കുവാന് ഓഫീസില് ഇടമില്ലാത്തതാണ് ഇവരെ വലയ്ക്കുന്ന പ്രധാന പ്രശ്നം. പത്തനംതിട്ട കളക്ട്രേറ്റ് കെട്ടിടത്തിലെ മൂന്നാം നിലയിലാണ് ഓഫീസ് പ്രവര്ത്തിക്കുന്നത്. ഇടുങ്ങിയ മുറികളില് ദിവസവും എത്തുന്ന ഫയലുകള് കുന്നുകൂടിയതോടെ ജീവനക്കാര്ക്ക് ഇരിക്കുവാനും സ്ഥലമില്ലാതെയായി. ജില്ലയിലെ അന്പത്തിയെട്ട് സി.ഡി.എസ് കളിലെ ഫയലുകളാണ് ഈ ഓഫീസില് കൈകാര്യം ചെയുന്നത്. എഴുപതിലധികം ജീവനക്കാരും ഇവിടെ പ്രവര്ത്തിക്കുന്നു. എന്നാല് മേശക്ക് മുകളില് അടുക്കി വെച്ചിരിക്കുന്ന നിരവധി ഫയലുകളുടെ ഇടയില് നിന്ന് വേണം വിവിധ ആവശ്യങ്ങളുമായി എത്തുന്ന പൊതുജനങ്ങള്ക്ക് ജീവനക്കാരെ കണ്ടെത്താന്.
ഫയലുകള് വര്ദ്ധിച്ചതോടെ ഇരിക്കാന് ഇടമില്ലാത്തത് കാരണം പല ജീവനക്കാരെയും ഫീല്ഡ് ജോലികള്ക്കായി പറഞ്ഞയച്ചാണ് ഒരു ദിവസം തള്ളി നീക്കുന്നത്. വര്ഷങ്ങളായി കെട്ടികിടക്കുന്ന ഫയലുകളില് നിന്നുള്ള പൊടി ശല്യം കാരണം ജീവനക്കാര്ക്ക് തുമ്മലും ശ്വാസതടസവും അടക്കമുള്ള വിവിധ അസുഖങ്ങളും പിടിപെടുന്നുണ്ട്. എന്നിട്ടും യാതൊരു പരാതിയും പറയാതെ തങ്ങളുടെ ജോലി നിറവേറ്റുകയാണ് ഈ ജീവനക്കാര്. പാറ്റയും എലിയും അടക്കമുള്ള ജീവികളുടെ ശല്യം വേറെയും. കുന്നുകൂടി കിടക്കുന്ന ഫയലുകളില് നിന്നും അടിയന്തിര നടപടി സ്വീകരിക്കേണ്ട ഫയലുകള് കണ്ടെത്താന് ജീവനക്കാര് കഷ്ടപ്പെടുകയാണ്. വര്ഷങ്ങളായി ഇതാണ് ഇവിടുത്തെ അവസ്ഥ. ഓഫീസ് പുതിയ കെട്ടിടത്തിലേക്ക് മാറ്റണമെന്ന് ഇവര് ആവശ്യപ്പെടാന് തുടങ്ങിയിട്ട് കാലങ്ങള് ഏറെയായി. എന്നിട്ടും യാതൊരു നടപടിയും ഇല്ല.
