പത്തനംതിട്ട : നഗരസഭാ ബസ്സ്റ്റാൻഡ് യാർഡിന്റെ നിർമാണം പുരോഗമിക്കുന്നു. തകർന്നുകിടന്നിരുന്ന യാർഡിന്റെ കോംപാക്ടിങ് പ്രവർത്തനം അവസാനഘട്ടത്തിലാണ്. നിലവിലെ യാർഡിൽനിന്ന് 50 സെന്റിമീറ്റർ ഉയരത്തിൽ ജി.എസ്.പി. മിക്സ് ഉപയോഗിച്ച് കോംപാക്ട് ചെയ്യുന്ന പ്രവർത്തനങ്ങളാണ് നടക്കുന്നത്. ഇത് പൂർത്തിയായാലുടൻ മുകളിൽ 100 എം.എം. കൊരുപ്പുകട്ട പാകി ബസ്സ്റ്റാൻഡ് യാർഡ് നവീകരിക്കും.
യാർഡിലെ ഓടയുടെ നിർമാണവും ആരംഭിച്ചു. യാർഡിന്റെ തകർച്ചയ്ക്ക് കാരണമാകുന്ന വെള്ളക്കെട്ട് പൂർണമായും ഒഴിവാക്കുന്ന നിലയിലാണ് ഓട വിഭാവനം ചെയ്തിട്ടുള്ളത്. യാർഡിൽനിന്ന് 45 ഡിഗ്രി ചരിവിലാണ് ഓടയുടെ നിർമാണം. ഒാരോ 30 മീറ്റർ ഇടവിട്ടും വെള്ളം ഒഴുകിപ്പോകാനുള്ള സംവിധാനം ഉണ്ടാകും. ഇതോടെ വെള്ളം പൂർണമായും ഒഴുകിപ്പോകും. കരാർ കാലാവധി ആറുമാസമാണെങ്കിലും മൂന്നുമാസത്തിനുള്ളിൽ പ്രവൃത്തി പൂർത്തീകരിക്കാനാണ് ഉദ്ദേശിക്കുന്നത്.
