റാന്നി : അണിഞ്ഞൊരുങ്ങി സഞ്ചാരികളെ വരവേല്ക്കാന് തയ്യാറെടുത്ത് പെരുന്തേനരുവി ടൂറിസം സെന്റര്. നാളുകളായി കാടുമൂടി തകര്ന്നു കിടന്ന കുട്ടികളുടെ പാര്ക്കും നടപ്പാതകളും ശുചീകരിച്ചു മോടിയാക്കിയതോടെയാണ് പെരുന്തേനരുവി ടൂറിസം സെന്റര് മനോഹരമായത്. നദിയിലേയ്ക്കും പാര്ക്കിലേക്കും ഇറങ്ങുന്ന പടിക്കെട്ടുകള് ടൈല് പാകി മനോഹരമാക്കി.
കുട്ടികളുടെ പാര്ക്കില് തറയോടു പാകി കഴിഞ്ഞു. ഇരുമ്പു കൊളുത്തിലുള്ള ഊഞ്ഞാലുകളും ഇരിപ്പിടങ്ങളും സ്ഥാപിച്ചു. പാര്ക്കിന്റെ മേല്ക്കൂര വലിയ ഫൈബര് ഷീറ്റ് ഉപയോഗിച്ച് മറച്ചു. വലിയ കെട്ടിനോടു ചേര്ന്ന സ്ഥലങ്ങളില് പൂച്ചെടികള് വെച്ചു പിടിപ്പിച്ചു. വെള്ളം കയറുന്ന നദിയോടു ചേര്ന്ന ഭാഗത്ത് രാമച്ചമാണ് വെച്ചു പിടിപ്പിച്ചത്. പാര്ക്കിംങ് ഗ്രൗണ്ടിനോടു ചേര്ന്ന ഭാഗത്തും ചെടികള് വെച്ചു പിടിപ്പിച്ചു.
ഭിത്തികള് പുതിയ ചായം പൂശി മനോഹരമാക്കി. ശുചീകരണ മുറികളുടെ പഴയ കതകുകള് മാറ്റി പുതിയവ സ്ഥാപിച്ചു. ശുചിമുറിയിലേക്കുള്ള വെള്ളത്തിന്റെ കണക്ഷനും ശരിയാക്കി. ഇനി സഞ്ചാരികള്ക്കായി തുറന്നു കൊടുക്കുവാനാവും. സര്ക്കാരിന്റെ നൂറു ദിന കര്മ്മ പദ്ധതിയില് ഉള്പ്പെടുത്തിയാണ് നിര്മ്മാണ ജോലികള് നടത്തിയത്. നിര്മ്മിതി കേന്ദ്രത്തിന്റെ മേല്നോട്ടത്തിലാണ് ജോലികള് നടക്കുന്നത്.