കോട്ടയം : ജില്ലയില് പൊതുജനങ്ങളുടെ വാഹനങ്ങള്ക്ക് ഇന്ധനം നിറയ്ക്കാന് കഴിയുന്ന കെഎസ്ആര്ടിസി പമ്പ് പൊന്കുന്നത്ത് ഒരുങ്ങുന്നു. പദ്ധതിയില് ജില്ലയില് നിന്ന് പൊന്കുന്നം ഡിപ്പോ മാത്രമാണ് ഇത്തവണതെക്ക് പരിഗണിക്കുന്നത്. കഴിഞ്ഞ ദിവസം പമ്പിലേക്ക് ജീവനക്കാരെ നിയമിക്കുന്നതിനായി ഡിപ്പോയിലെ കണ്ടക്ടര്, ഡ്രൈവര്, മെക്കാനിക് വിഭാഗങ്ങളില് നിന്നുള്ളവരില് നിന്ന് അപേക്ഷ ക്ഷണിച്ചിരുന്നു. സൂപ്പര്വൈസര്, അക്കൗണ്ടന്റ്, സെയില്സ്മാന് തസ്തികകളിലാണ് അപേക്ഷ ക്ഷണിച്ചത്.
പമ്പ് സ്ഥിതിചെയ്യുന്ന സ്ഥലത്തിന്റെ റവന്യു രേഖകള് കെഎസ്ആര്ടിസി എസ്റ്റേറ്റ് ഓഫിസിന് നേരത്തെ കൈമാറിയിരുന്നു. ഡിപ്പോ സ്ഥിതി ചെയ്യുന്ന ഒരേക്കര് 60 സെന്റ് സ്ഥലത്ത് പൊന്കുന്നം – പാലാ റോഡിന് അഭിമുഖമായിട്ടാണ് പെട്രോള് പമ്പ് സ്ഥിതി ചെയ്യുന്നത്. പാലാ ഭാഗത്തു നിന്നെത്തുന്ന ശബരിമല തീര്ഥാടക വാഹനങ്ങള് ഉള്പ്പെടെയുള്ളവയ്ക്ക് ഇന്ധനം നിറയ്ക്കാന് പൊന്കുന്നം ഡിപ്പോയിലെ പമ്പ് ഏറെ സൗകര്യപ്രദമാണ്. പൊന്കുന്നം – പുനലൂര് റോഡ് വഴിയെത്തുന്ന വാഹനങ്ങള്ക്ക് സൗകര്യമായി ഇന്ധനം നിറയ്ക്കാന് ഇനി കഴിയും.
