തിരുവനന്തപുരം : കേരളത്തിലെ ഏറ്റവും പ്രധാനപ്പെട്ട പൊതുമേഖലാ സ്ഥാപനമാണ് കെഎസ്ആര്ടിസി. ചെറിയ തുക നല്കി സാധാരണക്കാരന് യാത്ര ചെയ്യാന് കഴിയുന്ന ഏക മാര്ഗം. ഒന്നാം പിണറായി സര്ക്കാര് അധികാരത്തിലേറാന് ഏറ്റവുമധികം ഉലയൂതിയവരില് പതിനായിരക്കണക്കിന് വരുന്ന കെഎസ്ആര്ടിസി തൊഴിലാളികളും ഉണ്ടായിരുന്നു. ഉമ്മന്ചാണ്ടി സര്ക്കാര് ഈ കോര്പ്പറേഷനെ വഴിയാധാരമാക്കിയെന്നും എല്ഡിഎഫ് വന്നാല് എല്ലാം ശരിയാകും എന്നും വിശ്വസിച്ച തൊഴിലാളികള് തങ്ങളുടെ കുടുംബത്തോടൊപ്പം നാട്ടിലിറങ്ങി വോട്ടുപിടിച്ചതിന്റെകൂടി ഫലമായിരുന്നു ഒന്നാം പിണറായി സര്ക്കാര്.
എന്നാല് ഇപ്പോള്, സംസ്ഥാനം കണ്ട ഏറ്റവും വലിയ തൊഴിലാളി വരുദ്ധ നിലപാടാണ് കെഎസ്ആര്ടിസി പ്രതിസന്ധിയില് സംസ്ഥാന സര്ക്കാര് സ്വീകരിക്കുന്നത്. സംസ്ഥാനത്തെ ഏറ്റവും പ്രധാനപ്പെട്ട കോര്പ്പറേഷന്റെ ജീവനക്കാര്ക്ക് ശമ്പളം ഉറപ്പാക്കേണ്ട ചുമതല തങ്ങള്ക്കില്ലെന്നാണ് പിണറായി സര്ക്കാര് ഹൈക്കോടതിയില് ഫയല് ചെയ്ത റിട്ട് പെറ്റീഷനില് പറയുന്നത്. കെഎസ്ആര്ടിസി ജീവനക്കാരും പ്രതിപക്ഷവും മാത്രമല്ല, ഇടതുപക്ഷത്തെ സ്നേഹിക്കുന്നവരും ആത്മാര്ത്ഥതയുള്ള സിപിഎമ്മുകാരുപോലും ഞെട്ടിപ്പോകുന്ന നിലപാടാണത്.
