അബുദാബി : ട്വന്റി 20 ക്രിക്കറ്റിൽ ചരിത്രനേട്ടത്തിനുടമയായി ഇന്ത്യൻ സ്പിന്നർ പീയുഷ് ചൗള. ട്വന്റി 20 യിൽ ഏറ്റവുമധികം വിക്കറ്റ് നേടിയ ഇന്ത്യൻ താരം എന്ന റെക്കോഡാണ് ചൗള സ്വന്തം പേരിൽ എഴുതിച്ചേർത്തത്. സൺറൈസേഴ്സ് ഹൈദരാബാദിനെതിരായ മത്സരത്തിൽ മുംബൈ ഇന്ത്യൻസിന് വേണ്ടി കളിച്ചപ്പോഴാണ് ചൗള ഈ നേട്ടം സ്വന്തമാക്കിയത്. ആഭ്യന്തര, അന്താരാഷ്ട്ര മത്സരങ്ങൾ ഉൾപ്പെടെയാണിത്. മത്സരത്തിൽ മുഹമ്മദ് നബിയുടെ വിക്കറ്റെടുത്തതോടെ ചൗള അമിത് മിശ്രയെ മറികടന്ന് റെക്കോഡ് സ്വന്തമാക്കി.
നിലവിൽ 249 മത്സരങ്ങളിൽ നിന്ന് 263 വിക്കറ്റുകളാണ് ചൗളയുടെ അക്കൗണ്ടിലുള്ളത്. രണ്ടാം സ്ഥാനത്തുള്ള മിശ്ര 236 മത്സരങ്ങളിൽ നിന്ന് 262 വിക്കറ്റുകൾ വീഴ്ത്തി. ചൗളയും മിശ്രയും ഐ.പി.എല്ലിലെ വിക്കറ്റ് വേട്ടക്കാരുടെ പട്ടികയിൽ ആദ്യ അഞ്ച് സ്ഥാനങ്ങളിലുണ്ട്. ഐ.പി.എല്ലിൽ ഏറ്റവുമധികം വിക്കറ്റ് നേടിയ ഇന്ത്യൻ താരം എന്ന റെക്കോഡ് അമിത് മിശ്രയുടെ പേരിലാണ്. 154 മത്സരങ്ങളിൽ നിന്ന് 166 വിക്കറ്റുകളാണ് താരം നേടിയിരിക്കുന്നത്. രണ്ടാമതുള്ള ചൗള 165 മത്സരങ്ങളിൽ നിന്ന് 157 വിക്കറ്റുകൾ എടുത്തിട്ടുണ്ട്.
