കൊച്ചി: ഓണാഘോഷത്തിന് പാട്ടൊക്കെ വച്ച് അടിച്ചു പൊളിച്ചാല് ഒരുപക്ഷേ നിങ്ങള് നിയമക്കുരുക്കില് പെട്ടേക്കാം. പകര്പ്പവകാശമുള്ള പാട്ടുകള് പൊതുവിടത്തില് ഉപയോഗിക്കുന്നതിനുള്ള നിയന്ത്രണമാണ്, കൂട്ടം ചേര്ന്നുള്ള ആഘോഷത്തിലെ സംഗീതത്തിന് വിലങ്ങുതടിയാവുന്നത്. മ്യൂസിക് കമ്പനികള് പകര്പ്പവകാശ ലൈസന്സ് ലൈസന്സ് കൈകാര്യം ചെയ്യാന് നിയോഗിച്ച ഏജന്സി ഇക്കാര്യത്തില് മുന്നറിയിപ്പു നല്കിക്കഴിഞ്ഞു.
1957-ലെ പകര്പ്പവകാശ നിയമത്തിലെ വ്യവസ്ഥകള് പ്രകാരം, ആഘോഷ പരിപാടികളില് പകര്പ്പവകാശമുള്ള സംഗീതം പൊതുവായി കേള്പ്പിക്കുന്നതിനോ ഉപയോഗിക്കുന്നതിനോ ബന്ധപ്പെട്ട പകര്പ്പവകാശ ഉടമകളില് നിന്നോ അംഗീകൃത പ്രതിനിധികളില് നിന്നോ മുന്കൂട്ടി അനുമതി വാങ്ങേണ്ടതുണ്ട്. ഇക്കാര്യം ചൂണ്ടിക്കാട്ടി പരിപാടികളുടെ സംഘാടകര്ക്കോ വേദി നല്കുന്നവര്ക്കോ അറിയിപ്പു നല്കുന്നുണ്ടെന്ന് മുബൈ ആസ്ഥാനമായ ഏജന്സിയായ നൊവാക്സ് കമ്യൂണിക്കേഷന്സിന്റെ കേരളത്തിലെ പ്രതിനിധി എം ഉണ്ണികൃഷ്ണന് പറഞ്ഞു.
